Shillong, Rymphang 26:U Bah Charles Marngar MLA ka Mawhati mynta ka sngi ha ka dorbar mang tyngka, u la buh ka jingkyrpad sha ka sorkar ban pynkhlaiñ ki bor pahara haki khappud ka jylla khamtam ha Mawhati Constituency ban phah briew shuh shuh sha Mawlasnai Police Outpost bad kumjuh ruh ha Umsiang Police Outpost kiba don ha khappud ka Meghalaya bad Assam ban pynthikna ba ki paidbah kiba shong ba sah ha khappud khamtam ka thaiñ Block II kin don hapdeng ka jingim suk khlem shah pynthud.

U Bah Charles u la buh jingkylli ruh sha ka sorkar la ka don ne em ka jingthmu ban pynkhlaiñ ki bor pahara sha ki thaiñ khappud ka jylla naduh ki Police Outpost bad ki Police Station khnang ba ki paidbah kin im hapdeng ka jingshong suk shong saiñ.

Kumba long mynta ka thaiñ Mawhati khamtam ki paidbah haka thaiñ Block II ki dang im hapdeng ka jingshongsuk bad kane baroh ka dei ka jingtrei shitom jong ki pulit bad naka liang u MLA u la ai khublei ïa u Myntri kam pohiing ka jylla bad kumjuh ruh ki pulit halor kane ka bynta.