DANGBAH BA NGAN IAP BAN ÏA KABA KA JAID BYNRIEW KAN DUH ÏA KA UMIAM BAD LUMPONDENG: NONGLANG

Shillong, Ïaiong 17: Hadien ka jingïaid lynti kaba 9 sngi ha ka jingïakhih da kaba shong shah thngan khlem pud sngi, mynta ka janmiet la pynkit noh ïa u Chairman ka Green Tech Foundation u Bah H. Bansiewdor Nonglang sha Civil Hospital Shillong, kata hadien ba ki nongïalam ha ryngkat u paidbah ki la pynbor ïa u ban shah sumar noh namar ka jingtlot bor shaba palat.

Hashwa ban rah noh sha Civil Hospital ïa u Bah Nonglang, u la kren da kaba ong, ba ka jingïap kam dei ka jubab ïa kito ki men die ri sha u Mynder ngi dei ban ioh ïa ka jingjop bad lada u paidbah un leit buh ïa u sha Hospital un treh ban leit bad u la kyrpad ïa ki paidbah ba kin pyndap biang ïa ka madan Malki ban pynkhynniuh ïa ka Secretariat bad ban nym pyndem da leilei ruh hakhmat ki mentuh.

Lah ban kdew, u Bah H. Bansiewdor Nonglang Chairman ka GTF, u la ïakhih da kaba shah thngan khlem pud sngi halor ka jingdawa ban weng noh ïa ka dewlynnong Lumpongdeng kaba don 36 acre na ka jinglilam sha ki company ban tei ïa ka Taj Resort and Spa ha Umiam.

Kumba long, ka jingshah thngan ka la ïaid haduh 9 sngi, ha kaba u Bah Nonglang u la khie tlot shaba palat kaba la pynlong ïa kiwei ki nongïalam ha ryngkat ki riew paidbah ban kyrpad ïa u ba un leit shah sumar noh bad kim kwah ban jia kano kano ka jingjia ba sngewsih.

Hashwa ban pynrung shapoh Civil Hospital, u Bah Nongrang u la kren biang da kaba ong, “wat khuslai na bynta jong u, hynrei khuslai na bynta ka Umiam bad ka dewlynnong Lumpongdeng, lada ym lah ban ioh biang ïa ka Lumpongdeng ka dei ka jingïaleh kaba rem jong ka Jaidbynriew bad lada ngi jop ngin long trai biang ïa ka Umiam bad Lumpongdeng” ong u Bah Nonglang.