Ki nongialam ka Khasi Student Union, ka East Jaintia Hills District Unit ha ka 17 tarik Nailar, ki la hiar ban leit ai mynsiem ia ki nongialam shnong bad ki nongshong shnong kiba don ha Lailong kiba kynthup ia ki saw tylli ki dorbar shnong kiba don ha ki khappud ka jylla Meghalaya bad ka Bangladesh.
Kine ki shnong kiba don ha khappud, ba ki nongialam ka KSU, EJHDU ki la shimkhia ban leit jurip bad ruh ban ai mynsiem ki kynthup ia ka lejri,Lahalein,Huroi bad Hingaria.
Katkum ka jingpyntip da u Hamewanpynhun Ryngkhlem, Publicity Secretary ka KSU EJHDU, la iathuh, ba ka jingthmu hi jong ka seng ban hiar sha kine ki shnong kiba don ha khappud ka Meghalaya bad Bangladesh ka long hi halor ka nongrim ban ai mynsiem ia ki nongshong shnong bad nongialam shnong na ki jingiakajia ba la jia ha ka ri Bangladesh bad ruh ban pan ia ka jingiatreilang kumno ban peitngor bad ban iada na ka jingwanrung tuh ki khar Bangladesh sha kane ka jylla lyngba kine ki shnong kiba don ha khappud.
La iathuh ruh, ba ha kane ka jingleit hiar ka KSU sha ki shnong khappud la ioh ban ia shong jingialang ha ka shnong Huroi, ha kaba la wan ban ia shimbynta lang ruh da ki nongialam shnong jong ki saw tylli ki dorbar shnong ha ryngkat ki nongialam bad dkhot ka KSU napoh Lejri Unit, Huroi Unit bad Hingaria Unit.
U Samla Ryngkhlem u la pyntip ruh, ba ha ka jingiathir ia mir jingmut halor kine ki mat, la ioh jingtip, ba ki Dorbar Shnong bad ki dkhot ka seng, ki la long kiba peit pyrman bha halor ka jingpyrkhing ia ka jingioh rung tuh ki khar Bangladesh bad haduh mynta kam pat don kane katai lait noh tang ki jingeh ha ka liang ka khaii ka pateng ha kine ki thaiñ.
“Ka Seng ka la ioh ia ka jingpynsngew ruh, na ka liang ka Unit jong ka Hingaria, ba ki bor peit pyrman jong ki pulit ka tnad BSF kim ju shong ne peitngor ha khappud hynrei ki la don bad iaid pahara pynban hapdeng u surok, u ba don ka jingjngai kumba 3 ne 4 kilometer na ka khappud ka shnong bad ka Bangladesh kaba long shisha kaba sngewkhia haduh katta katta”, pyntip u samla Ryngkhlem.
Shuh shuh ruh, na ka liang ka seng ka la leit ruh ban jngoh ia ki BOP ha ka shnong Huroi bad Lailong bad ruh ban ia mir jingmut bad ki shipai ka tnad BSF hashwa ban jurip ia ka Border Fencing ha kaba la ioh jingtip ruh ba ki bor shipai ki dang iai pyrkhing bad pei pyrman bha ban iada ia ka jingrung tuh ki nong Bangladesh sha kane ka jylla Meghalaya bad shen ka seng kan sa hiar sha ki katto katne tylli ki shnong khappud bad ka Bangladesh kiba kynthup ia ka Kuliang, Donaskur,Dona Umbluh Ampyrdit kiba dei ki jaka ba shu ioh rung suk bha ki nong Bangladesh kiba ju siew ia kita ki Dalal ban pynrung suk ia ki sha kane ka ri bad ka jylla.
Ka KSU ka la buh ruh ia ka jingkyrpad, ba ki paradoh parasnam ki dei ban kiar ia mynta ban ia rung ne mih shabar ka jingker Fencing jong ka Meghalaya bad Bangladesh ban kiar na kino kino ki jingjia ba sngewsih namar la ioh jingtip ba ka sorkar Bangladesh ka la hukum ia ki shipai pyrkhing khappud jong kane ka ri ban siat naphang ia kiba rung beain sha ka Bangladesh.
