Hadien ka jinglen jong ka Kong Iunika Bamon ban phla ha kaba ïadei bad ka jingshah bom dusmon jong u lok jong ka u Bah Dlas Shadap haka miet jong ka 26 tarik Naitung, haka shnong Umshangktad kaba hap ha Mawlasnai Police Station ha Ri-Bhoi District mynta ka sngi kala mih shakhmat ban phla ïaka jingshisha ba dei u hynmen jong ka u Kitbok Bamon u ba la donkti ban bom dusmon da u dieng bad ban pom ruh da ka wait ïa u lok jong ka bad kam shym la nud ban phla ha katei ka sngi namar ka jingbyrngem byrsit naka kmie bad u hynmen jong ka lada ka ïathuh briew kan ngat lang kumjuh.
Kala ïathuh ruh ba mynta ka don hapdeng ka jingjynjar bad met bad mynsiem namar ka jingshah thwet man ka miet hala ka jong ka kmie bad kam nud shuh ban thiah ban sah ha iing lajong bad hap ban phetrieh kat shaba don ba ai jaka sah ryngkat 6 ngut ki khun bad bun naki paidbah ha katei ka shnong kila kyntaid ban plie iing ïaka namar ka jingshah pynthud haka kmie jong ka kaba la byrngem pyniap beit bad teng teng ka hap ban thiah wat sha khlaw ryngkat ki khun khlem bam khlem dih.
Naka liang ka kong Iunika Bamon kala kyrpad ïaki bor jong ka aiñ ban ai ka jingïada bad ban kem mar dor ïa kitei kiba donkti ha katei ka kam namar lada ka aiñ kam leh eiei ka jingim jong ka ka don hapdeng ka jingsyier kumba kala shah byrngem pyniap haka kmie lajong ka kong Wanri Bamon.
