U para jong u Bah Dlas Shadap u ba dei u rangbah bala shah bom dusmon haka miet jong ka 26 tarik Naitung haka shnong Umshangktad mynta ka sngi u la leit ban ujor syndon sha u SP ka RI-Bhoi ban shimkhia ïa katei ka kam, namar naduh bala buh ïaka jingujor ejehar ha Mawlasnai Police Outpost ha katei hi ka sngi ki pulit kim pat shimkhia ban kem ïa ki briew ba donkti watla ka lok kala dep ban phla ba dei u hynmen jong ka u ba donkti ha katei ka kam.
Haba kren sha ki lad pathai khubor mynta ka sngi naka liang u Bah Plas Shadap u ba dei u para trai jong u Bah Dlas Shadap u la pynpaw ka jingsngewkhia halor ka jingsuki ka tnad pulit ban pynlong ka jingtohkit namar haduh mynta la jan ar taiew ki pulit kim pat kem satia ïa u briew ba donkti ha katei ka kam wat hadien ba kila dep ban buh da ka ejahar ha Mawlasnai Police Outpost bad kumta kum ka iing ka sem bad ki bor shnong kim banse ban ujor syndon sha u SP ban kyrpad ïaka tnad pulit ban pynsted ïaka jingtohkit bad ban kem mardor ïa ki briew ba donkti ha katei ka kam.
Wat ki bor shnong lyngba u Bah Batskhem Sohtun kala buh ka jingkyrpad sha ki bor ka aiñ ban kem mardor ïakitei ki briew kiba donkti namar kum ka shnong kala tip shai ïaki kyrteng jong ki briew ba donkti ha katei ka kam namar kum ka shnong ka thaw kam don jingsuk shuh lada kitei ki briew ki dang ioh ban ïaid sahuh ha shnong ha thaw khamtam ka jingsyier mynsiem ïaka kong Iunika Bamon kaba dei ka lok jong utei u ba shah bom dusmon.
U la ïathuh ba mynta kala don ka jingshah byrngem pynïap wat sa u Rangbah Shnong u ba la pyrshang ban ïada bad ban ai jaka rieh ïaka kong Iunika Bamon, bad u la pyntip ruh ba ka longiing jong katei kong Wanri Bamon kaba dei ka kmie jong ka ka dei ka longiing kaba la don bun ki dak saw haka shnong bad ka jingpynthud ïaka shongsuk shongsaiñ ka shnong ka thaw baroh kawei.
