Nongpoh, Nailar 07: Ban peitngor bad ban tip ïoh don ki briew kiba nabar, kiba wan ban buhai shnong beain ha ki shnong kiba hap ha Raid Marwet kaba dei hadien ka jingkhynra naphang ka sorkar Assam ia ki mynder kiba wan shong beain ha ka jylla Assam, u Paiem Ken Syiem, Syiem ka Raid Marwet, mynta ka sngi u la khot jingialang ia baroh ki rangbah shnong kiba hap hapoh ka Raid, nangta ia ki nongialam seng bad ki Bor Pulit, na bynta ban iatreilang, khnang ban wanrah ia ka bha ka miat ha ki shnong ki thaw bad khamtam eh na bynta ban peit pyrman ia ka jingwan ki briew nabar ha ki shnong kiba hap hapoh ka Raid Marwet.
Kane ka jingshiim khia ban pynlong ia kane ka jingialang ka long ban ia kren na ia tai sani halor ki lad jingiada sha kitei ki shnong ba bun ki shnong kiba hap hapoh ka Raid Marwet ki don ha syndah ka jylla Assam.
Ia katei ka jingialang, la pynlong ha ophis u Syiem ka Raid Marwet, ha kaba nalor ka jingdon ki Rangbah Shnong, la sakhi ruh da ka jingdon u Bah Sosthenes Sohtun, MLA Jirang, ki Pulit ka Khanapara Police Station, ki nongialam seng lem bad kiwei.
Lyngba katei ka jingialang, ka la don ka jingiakren bad ka jingiatai hapdeng jong baroh kiba la leit ban iashimbynta ha katei ka jingialang, ha kaba ka jingiakren ka la long kaba seisoh bad baroh ki rangbah shnong kiba hap hapoh ka Raid Marwet, ki la shim ia kawei ka rai bad kata ka long, ba kin iatreilang na bynta ban tehlakam ia ki kam sniew bad ruh ban long kiba peitngor ia ka jingwan rung ki briew nabar, khamtam eh ha kaba kum kane ka por, ba ka sorkar Assam, ka la kyndang naphang ia ki mynder bad kiba la shong beain ha Assam.
Ka la don ruh ka jingiakren hapdeng ki para nongialam Shnong, ba nangne shakhmat ki dei ba long kibe peitngor ia ki briew nabar haba ki wan sha ki shnong ki thaw, kata naduh ki briew kiba wan ha ka dur ki nongbylla lem bad kiwei, namar ba ki shnong kiba hap ha Raid Marwet, ki dei ki shnong kiba don ha syndah eh bad ka jylla Assam.
Haba iadei bad katei ka jingialang, na ka liang u Bah Sosthenes Sohtun, kum u MLA u la ai jingiaroh ia u Syiem Raid Marwet, uba la shimkhia ban pynlong ia katei ka jingialang da kaba lum ia baroh ki rangbah shnong jong ka Raid Marwet, ha kajuh ruh ka por u la ong, ba ka jinglah ban pynlong ia kaba kum katei ka jingialang, ka long kaba donkam eh bad khamtam ban don ka jingiatreilang kaba jan hapdeng ki para rangbah shnong hapoh ka Raid Marwet.
