Nongpoh, Nailar 18: Khyndiat kynta ba ki paidbah na ka shnong Maikhuli, ki la pynkhyllem noh ia ki post Ilektrik, ba la wan thung beain da ka tnat Assam State Electricity Board (ASEB) ha Maikhuli, la don pat ka jingiakurup ne iashoh iadat hapdeng ki paidbah ka Maikhuli na Meghalaya bad ki paidbah na Assam.
Halor katei ka jingjia, la ong ba nyngkong ki paidbah ka shnong Maikhuli, ki la leit ban pynkhyllem noh ia u Post Ilektrik ka Assam ha ka por mynstep, kiba la pynieng da ka ASEB hajan ka pung Maikhuli bad hadien ba ki la dep ban pynkhyllem, ki la wanphai noh sha la ki jong ki iing ki sem.
La ong ruh, ba hadien ba ki briew na Maikhuli ki la pynkhyllem ia kitei ki post Ilektrik, la don ki briew na Assam kiba la sdang ban wad daw ia ki katto katne ngut ki briew na Meghalaya bad kumta, haba la tip paidbah halor katei ka jingshah wad daw ia ki briew na Meghalaya, ki paidbah ka Maikhuli, ki la poi sha katei ka jaka ba la don ka jingiania bad kaba la poi sha ka jingiashoh iadat bad ia kurup hapdeng jong ki.
Ha katei ka jingjia, la don ki longkmie na Maikhuli, ba ki la jot ki jainphong bad kata ka dei hadien ba ki la kurup ia ki longkmie bad longkpa na ka jylla Assam.
Haba la bna halor katei ka jingjia, ki bor pyniaid district na Meghalaya bad Assam, ki la poi sha katei ka jaka, na bynta ban tem ia ka jingiakynad bad kiba la lah ruh ban pynpra noh ia ki paidbah na Meghalaya bad Assam.
Hadien kata, ki bor district ka Meghalaya bad Assam, ki la rai ban thaw noh da ka Peace Committee, khnang ban wanrah ia ka suk ka sain bad ka jingiaieid hapdeng ki paidbah kiba sah ha katei ka thain Maikhuli, kaba dei ruh kawei na ki jaka khappud hapdeng ka Meghalaya bad Assam.
