Nongpoh, Nailar 18: Ki Pulit ka tnad Traffic na Nongpoh Police Station mynta ka sngi ki la pynlong ia ka jingkhynra ne bat ia ki Auto Rickshaw kiba kamai ha sor Nongpoh bad ha kane ka jingkhynra la lap ba bun ki Auto Rickshaw kim pynbiang ia ki kot ki sla kumba la buh da ka sorkar.
Ia kane ka jingkhynra ia ki Auto Rickshaw la pynlong ha ka surokbah hajan ka Bethany Hospital Nongpoh ha ka jingialam u Officer in-charge ka tnad Traffic u Rubul Ali lem bad kiwei ki ophisar bad ki Pulit na ka tnad Traffic Nongpoh.
Kumba la sakhi ruh ha kane ka jingkhynra ki Pulit ia ki Auto Rickshaw, la lap ba bun ki nongniah Auto Rickshaw kim don wat ia ka License, ki kot ki sla Kali ha kaba la shu kamai khlem kot khlem sla bad na kane ka jingshah bat bun ki Auto Rickshaw ki la hap ban siew ia ka kuna halor ka jingpynkhein kyndon.
Haba ia kren bad ki lad pathai khubor, u Officer In-charge ka tnad Traffic jong ka Nongpoh Police Staton, u Rubul Ali, u la ong ba kane ka jingpynlong ia kane ka jingkhynra ia ki Auto Rickshaw ka dei shi bynta ban ai jinghikai ba ki hap ban bud ia ki kyndon katkum ka Motor Vehicle Acts bad ruh ban tehlakam ia kito ki ba pynkheiñ ain klem da don ki license bad ki kot ki sla Kali.
U la iathuh ruh ba ha kane ka jingkhynra la lap ba bun kim don wat ia ka License bad ki kot ki sla, ha kaba kane ka buh jingma ia ki paidbah nongleit nongwan bad na ka liang ki pulit ki la dain kuna ruh ia kito kiba ym don kot don sla bad ruh kiba ym don License, namar kane ka buh jingma bad ym don jingshngain ia ki paidbah ba shong Auto Rickshaw ha ka leit ka wan ha kane ka sor Nongpoh.
Shuh shuh, u la bynrap ruh ba ki Pulit ki dang bteng ia kane ka jingkhynran ne bat ia kiba pynkheiñ ain bad la leh ruh ia kane na ka bynta ka jingshngaiñ ki paidbah bad ruh ba ki hap ban bud katkum ki kyndon jong ka Motor Vehicle Act, u la bynrap.
