Nongpoh, Nailar 18: Ka Estimate Committee jong ka Meghalaya Legislative Assembly hapoh ka jingïalam u Bah Mayral Born Syiem, MLA ka Nongpoh uba long ruh u Chairman, mynta ka sngi ka la leit ban jurip ïa ki jingtei sorkar kiba dang sah khongreng hapoh Ri-Bhoi. Kitei ki jingtei ki kynthup ïa ka Polytechnic bad ka Industrial Training Institute (ITI) ha ka Raid Nongkhrah, Nonglyngdoh, kumjuh ruh ïa ka ophis jong ka Umsning C&RD Block kaba dang ïaid shaid shaid ha Umsning.
Ha katei ka jingjurip la sakhi ruh da ka jingdonlang ki dkhot jong ka Committee kynthup ïa u Bah Charles Marngar MLA ka Mawhati, Bah Wailadmiki Shylla MLA ka Jowai, Bah Adelbert Nongrum MLA ka North Shillong, Remington G. Momin MLA ka Rambrai Jyrngam bad u Dr. Celestine Lyngdoh MLA ka thaiñ Umsning ryngkat ki heh ophisar ka sorkar bad ki nongïalam shnong.
Nyngkong, ka Committee ka la leit ban jurip ïa ka ITI kaba la mang pisa haduh T.1.23 klur ban ai jinghikai ha 4 tylli ki trade ba kynthup ïaka Electrician, Fitter, Mechanic Diesel bad Welder. Hynrei mynta ka shu sah tang ka iingjah namar ka jingbym pat biang ki lad ka leit ka wan kum ki surok, ka bording elektrik bad kiwei ki jingdonkam.
Shuh shuh ka Committee ka la leit ruh ban jurip ïa ka Polytechnic kaba la mang pisa da ka sorkar pdeng haduh T.12.30 klur ban ai jinghikai ha ki Course Diploma in Interior Design bad Beauty Culture & Cosmetology. Ka kam ka la poi haduh kumba 90% bad khmih lynti ba yn sa lah ban pyndep noh kham kloi na ka bynta ka jingmyntoi jong ki samla pule ka thaiñ. Ka Committee ka la bthah ïa ki tnad sorkar ba dei peit ban pynkloi ïa ka kam khnang ba kan long ka jingmyntoi bad ka jingkyrkhu ïaki samla pule.
Katba ha Dewlieh, Umsning, ka Committee ka la leit jurip ruh ïa ka ophis ba thymmai jong ka Umsning C&RD Block bad la bthah ïaki ophisar bad u kontraktor ba dei ban pyndep noh mardor shuwa u bnai Nohprah, namar mynta ki paidbah bad wat ki nongtrei jong ka ophis BDO ki shem jingeh ha ka jaka ba mynta kaba khapngiah shaba palat, bad kumba kajingtei ïa katei ka Block kala shim por shaba palat.
Haba kren bad ki lad pathai khubor, u Bah Mayral Born Syiem u la pynpaw ka jingsngewkmen halor ka jingshimkhia jong ka Committee ban leit jurip ïa ki kam pynroi kiba sahdien hapoh Ri-Bhoi. U la ong ruh ba lyngba kane ka jingjurip kan long ka lad ban pynsted ïa ka jingpyntrei ïa ki projek sorkar namar ka Committee kan sa rah ïa ka kaiphod sha ka sorkar ba ka dei ban pyndep noh kham kloi na ka bynta ka jingmyntoi jong u paidbah.
