Nongpoh, Nailar 27: U Damanbait Lamare, MLA Umroi, u la phah ka khubor sngewlem sha kiba haiing hasem jong u Babu Everlasting Pyngrope, Principal ka Mynken Christian Higher Secondary School bad uba dei ruh u Tymmen Basan ka Balang Presbyterian Umroi bad uba la khlad noh hynnin ka sngi na sla pyrthei, hapoh ka jaka sumar ha Appolo Hospital, Guwahati.
Haba iadei bad ka jingkhlad noh u Babu Everlasting Pyngrope, u Damanbait Lamare, u la ong ba ka jingkhlad jong u, ka la wanrah ia ka jingduhnong bad jingsngewsih kthang ym tang ia ka Mynken Christian Higher Secondary School Bhoirymbong ne ia ka Balang Presbyterian Umroi, hynrei ka la dei ka jingduhnong kaba khraw eh ia ka thain Ri Bhoi Mihngi hi baroh kawei, namar u Babu Everlasting Pynrope, u la dei shisha u briew uba la paw ha ka thain bad uba la dei uwei na u riew rangbah, uba la kyntiew ia ka pule puthi ha katei ka thain.
U Babu Everlasting Pyngrope, u la long kum uwei na ki nonghikai, ba la lah ban wanrah nam ia ka skul Mynken Higher Secondary School Bhoirymbong ha ka kam ialehkai sport bad halor kata ka dei halor ka jingioh ban mihkhmat kaba khah khah ia ka jylla sha Subroto Cup sha Nongbah Delhi bad nalorkata, u dei ruh u nonghikhmai, uba la ioh ban pdiang ia ka National Teacher’s Award, kaba u la pdiang kti ka President ka Ri India ka Droupadi Murmu ha Nongbah Delhi.
