Nongpoh, Naiwieng 12: U Myntri khynnah ka sokar pdeng u B.L Verma ba dei peit ia ka tnad Consumer Affairs, Food and Public Distribution ha ka jingwan jngoh ia ka Ri Bhoi District kum kata ka Aspirational District u la lum da ka jingialang ia baroh ki tnad sorkar bad ki ophisar na ka bynta ban wad bniah ia ka rukom pyntreikam ia ki kam pynroi kiba dei katkum ka jingma kum kata ka Aspirational District bad ha kajuh ka por ruh u la iaraoh ia ki jingpyntreikam ia ki kam pynroi bad khamtam ba ka sorkar Meghalaya ka phai khmat ban kyntiew ia ki kam pynroi ha kane ka jylla.

Haba kren sha ki lad pathai khubor, u B.L Verma u la ong ba ka u Myntri rangbah ka ri, u Narendra Modi u phai khmat bha na ka bynta ka jingkiew shaphrang ki jylla shatei lam mihngi ka ri India bad kum u Myntri rangbah u la ju wan iuh kjat sha kine ki jylla shatei lam mihngi ka ri na ka bynta ban kyntiew ia ki kam pynroi ha kine ki jylla.

U la pynpaw ruh ia ka jingsngewhun mynsiem ha ka jingialam u Myntri rangbah ka jyla u Conrad K. Sangma ka sorkar ka la trei shitom ban kyntiew ia ki kam pynroi ha ka jylla bad u la kular ruh ka sorkar pdeng kan ia trei ryngkat bad kane ka sorkar jylla na ka bynta ban dang saindur shuh shuh ia ki kam pynroi kiba u paidbah u donkam ha kane ka jylla.

Ha kane ka jingialang ba la lum kyrpang ia baroh ki heh ophisar ka District la shim bynta lang ruh da u MLA ka Nongpoh u Bah Mayral Born Syiem, u Deputy Commissioner ka Ri Bhoi, u Abhilash Baranwal bad kiwei kiwei ki ophsiar. U B.L Verma u la pynpaw ruh ba u la tih bniah bha ia ki jingpyntreikam ia ki kam pynroi ha kane ka jingwan jurip jongu bad u angnud ban dang trei shitom na ka bynta ban dang kyntiew shuh shuh ia ki kam pynroi hapoh kane ka District Ri Bhoi.