Nongpoh, Nohprah 11: Kan long shisha ka jingmyntoi kaba khraw kyrpang eh ia ka Nongpoh Constituency bad ia ka Ri Bhoi District bad ruh ia ka jylla baroh kawei, ha kaba  mynta ka sngi u ha ka sien kaba nyngkong eh ha ka jylla u Myntri rangbah ka jylla u Conrad K. Sangma u la wan ban plie paidbah iaka Eklavya Model Residential Schools ha Pahamsyiem ba la sdang ruh ka jingpynlong Klas (Academic session) ia ki khynnah kiba wan pule ha katei ka skulbah.

Ha kane ka sngi, u Myntri rangbah u Conrad K. Sangma ym tang ba u la wan ban plie paidbah ia katei ka skul bad u la wan buh ruh ia ki mawnongrim na ka bynta ban tei ia ka Synthetic Athletes Track ha Chinchona Pahamshyiem bad ruh ia ka Convention Centre ban tei da ka sorkar ha ka Shnong Pahamsyiem.

La sakhi ruh ha kane ka sngi da ka jingdon lang u Myntri ka tnad pule puthi u Bah Lakmen Rymbui, u Myntri ka tnad ba peit ia kam sports u Bah Wailadmiki Shylla, u Myntri ka tnad ba peit ia ka tnad C&RD u Bah Sosthenes Sohtun, u MLA ka Nongpoh u Bah Mayral Born Syiem, ka MDC ka Nongpoh ka Kong Rona Khymdeit, u Deputy Commissioner ka Ri Bhoi u Abhilash Baranwal lem bad kiwei kiwei ki heh ophisar sorkar.

La pynphuh pynphieng ruh ha kane ka sngi, da ka jingshim bynta ki nongialam shnong, ki longkmie longkpa, ki samla bad ki khynnah skul kiba wan ban pule ha katei ka skulbah ba la tip paidbah kum ka Eklavya Model Residential Schools, kaba dei ruh ka sien kaba nyngkong eh ba la pyniaid shaphrang da ka sorkar ha ka jylla.

Haba kren ha kane ka sngi kum u kongsan, u Myntri Rangbah ka jylla u Conrad K. Sangma u la ong, ba kine kiei kiei baroh ki la wan ban urlong ha ka jylla, ka dei ka jingphai khmat bad ka jingkylluid mynsiem naduh u Myntri rangbah ka ri u Narendra Modi, u Myntri ka tnad Tribal Affairs bad ka sorkar India ha kaba kine ki kam pynroi ki la wan poi sha kane ka jylla bad kaba la long ruh ka jingkyrkhu ia ki samla pule ban ioh ban pule ha kum kane ka skul kaba wan rah kyrpang da ka sorkar India.

U la ong ruh ba ka pule ka puthi ka dei ka mat kaba hakhmat eh ba ka sorkar jylla ka angnud ban kyntiew, ha kaba tang hapoh ki 7 snem ka jingmang tyngka na ka bynta ka pule ka puthi ka la kiew ha kaba ha u snem 2018 la mang tyngka haduh 2000 klur na ka bynta ban kyntiew ia ka pule ka puthi bad haduh u snem 2025 la mang tyngka kyrpang ruh na ka bynta ban kyntiew ia ka pule ka puthi haduh 3500 klur.

Shuh shuh, u la ong ruh ba ka sorkar jylla ka phai khmat bha sha ka tnad pule puthi na ka bynta ban kyntiew ia ka pule ka puthi ki khun samla ha ka jylla, namar dei tang lada ngi lah ban kyntiew ia ka pule ka puthi ngin lah ban wan rah ia kataka jingkylla ha baroh ki liang hapoh ka jylla.

U la bynrap ruh ba dang don bun ki skul EMRS ki ban sa tei ha ka jylla ha kaba haduh mynta ki la don 38 tylli bad ka sorkar ka la mang tyngka haduh 1400 klur tyngka ban tei ia kitei ki skul, kiba long ka jingmyntoi na ka bynta ki khun samla ban kiew ha ka liang ka pule ka puthi, u la bynrap shuh shuh.