Nongpoh, Nohprah 11: Hynnin ka miet ba ki Pulit Ri Bhoi, kaba la ialam da V.S Rathore, Senior Superintendent of Police ka Ri Bhoi, ki la pynlong ka jingtalasi ia ki kali kiba iaid ba ieng ha surokbah NH-6, kaba ki la pynlong hajan ka Thanad Byrnihat, u Bah Sosthenes Sohtun, MLA Jirang bad uba dei ruh u Myntri ka Sorkar jylla, u la leit ban iashimbynta bad synranlang ia ki Pulit Ri Bhoi, ha ka por ba ki dang pynlong ia ka jingtalasi kali.

Katei ka jingleit synran u Bah Sosthenes Sohtun, ka dei lehse ba u ioh jingtip ba ki Pulit Ri Bhoi, ki la pynlong ia katei ka jingtalasi ia ki kali ha Thanad Byrnihat, ha kaba ki la talasi bad dain kuna ia kito ki nongniah kali kiba pynkhein kyndon ain niah Kali, kiba kynthup naduh kaba tah iit iong, kiba niah ha ka por ba la buaid, ki bym deng ia u seat belt, kiba teh ia ki lait ba la palat ka rukom thaba lem bad kiwei.

Ha katei ka por jong ka jingtalasi kali da ki Pulit Ri Bhoi, Mizanur Rahman Kazi, uba dei u MLA ka AITC na Rajabala, u la shah pynsangeh ia ka kali kaba u shong, kat haduh ba un hiar na ka kali, na bynta ban ai khublei bad pynpaw ka jingiaroh ia ki Pulit ka Ri Bhoi, namar ka jingtrei shitom jong ki, ba wanrah jingshngain ia ki nongleit nongwan ha ka surokbah NH-6 ha Ri Bhoi.