Nongpoh, Rymphang 04: Ka Synjuk ki Rangbah Shnong kiba kynthup haduh 22 tylli ki shnong naduh Marngar Lailad shaduh sha Umkei,Umkra mynta ka sngi ki la leit ban jurip ia ka surok na Marngar Lailad ter ter shaduh sha ka Shnong Umta kaba la sniew noh dang shen da ka jingiaid bun ki Trok kit maw ba pyntrei ia ka surok Nongpoh sha Umden.

Ha kane ka jingleit jurip la ialam da u Bah Mission Tron President ka Synjuk bad u nongaibuit u Bah B.K Tmung lem bad ki dkhot kibala jurip ia ka jingsniew jong ka surok na Marngar sha Umta, halor ka jingwan iaid ki Trok kit maw ba pyntrei ia ka surok Nongpoh sha Umden.

Hadien ka jingjurip na ka liang ka Synjuk ki la leit ruh ban kynduh ia ki bor pyniaid ka Dhar Construction Company kaba pyntrei ia ka surok Nongpoh sha Umden bad ki la pynpaw ruh ba ka jingsniew ka surok ka dei naka daw ba ki Trok jong kane ka Company ki pyndonkam ia katei ka surok ha kaba kit maw na Umta ban shna ia kane ka surok na Nongpoh sha Umden.

Kumba la pynpaw da u Bah Mission Tron kum u President ka Synjuk, u la ong ba ka Synjuk ka sngewkmen hadien ba la ia kynduh ia ki bor pyniaid ka Dhar Construction Company, kiba la kular ban maramot ia katei ka surok ba la sniew kumba la kynnoh ba dei ka jingshah ktah na ka jingiaid ki trok kit maw ha kaba pyntrei ia ka surok Nongpoh sha Umden.

Shuh shuh, u la ong ruh ba ka Synjuk ka ai khublei kyrpang ia ka Dhar Construction Company ba ka la kular mardor ban maramot ia katei ka surok sniew bad ha kajuh ka por ruh ka synjuk ka khot ka wer ia ki paidbah ba kim dei ban pynthud ha kaba maramot ia kane ka surok na Marngar Lailad sha Umta kumba la kular da ka Dhar Construction Company, kaba de ka Companykaba pyntrei ban siang rong ia ka surok na Nongpoh sha Umden.