Nongpoh, Rymphang 04: Ki ophisar na ka tnat Land Record of Survey jong ka sorkar Meghalaya lem bad ki briew ka tnat Revenue ka sorkar Assam, mynta ka sngi, ki la pynlong ia ka jingleit jurip ne sorkbe sha ki 4 tylli ki shnong khappud ka Meghalaya bad Assam, ki shnong kiba shait mih ki kam iakajia pud bad kiba hap ha Raid Marwet.

Lyngba katei ka jingleit jurip, kitei ki ophisar Meghalaya bad Assam, ki la leit jurip ia 4 shnong Patharkuchi, Maikhuli, Pillangkata bad Barapathar, ha kaba lyngba katei ka jingleit sorbe jaka, ki la rah da ki tiar bad leh Map GPS, ki Map bad ruh ban iing briew ban kren ia ki briew ha kito ki jaka ba ym pat lah pynbeit ba ki dei kiba hap sha Meghalaya ne Assam.

Ha ka jingshisha kitei ki ophisar na kitei ki ar jylla, kim shym la treh ban kren ei ei sha ki lad pathaikhubor, da kaba ong ba kam dei ka kamram jong ki ban kren sha ki lad pathaikhubor, namar ka dei ka kam ban kren ne ai jingpynshai da ki heh sorkar, la ka long na Meghalaya bad Assam ruh kumjuh.

Ki la ong ruh, ba ka kamram jong ki ka long ban thew ia ki jaka ha ryngkat ban kren ia ki briew na bynta ban sngap ia ka sur jong ka jingkwah jong ki ba shano ki kwah ban don, la ka long ha Meghalaya ne Assam bad ia kata yn sa phah ia ka kaiphod sha ki la ki jong ki sorkar.

Ha katei ka sngi ba la don katei ka jingleit sorbe ki ophisar na Meghalaya bad Assam, la sakhi da ka jingdon u Bah Erik Dkhar, BDO ka Umling C&RD Block, u Ken Kyien, Syiem ka Raid Marwet lem bad ki katto katne ki nongialam shnong kiba hap ha Meghalaya.