Shillong, Rymphang 16: U Lat ka jylla u CH Vijayashankar mynta ka sngi u la pynpaw ba da ki hajar ngut ki longïing longsem ki la shah ktah  ia ka jakpoh ban kyrshan ia ka ing ka sem, kaba dei hadien ba ka National Green Tribunal ka la khang ia ka rukom tih dewiong ba la tip kum ka’ Rathole mining, ha kaba ka sorkar Meghalaya ka la iaid shaphrang ban thaw ia ki lad ki lynti na ka bynta ban ioh tih dewiong.

“Naduh ba ka NGT ka la khang ia ka jingtih dewiong ba la ju khot ka rat hole mining bad la ai rai ne pynskhem ruh da ka Supreme Court ka ingbishar ba  heh duh ka ri, da ki hajar ngut ki paidbah kiba shaniah ha ka kam tih dewiong ki la shah ktah ha ka laing ka jaka kpoh ban kyrshan ia ka ing ka sem” ong u Lat ka jylla haba kren mynta ka sngi ha ka jingsdang ka Dorbar mang tyngka ha ka jylla.

U la ong ruh ba ka sorkar ka la trei khlem da thaid ban buddien halor ki lad ki lynti kiba dei halor kane ka kam tih dewiong ban wan rah katkum ka juk stad mynta (Scientific Mining) khnang ba kan nym pyniap ja ia ki paidbah.

“Ka jingtreikam ka sorkar ban thaw ia ki lad ki lynti ban ioh tih dewiong kiba de katkum ka juk stad mynta ka la wan rah ia ka jingmyntoi” ong u Lat ka jylla bad bynrap ruh 3 ngut kiba la thep kyrteng ban ioh ia ka Scientific Mining ki la ioh ia ka jingmynjur na ka sorkar kmie bad ki la sdang ruh ia ka jingtih dewiong ba la ju shalan sha kylleng ki jylla ha ka ri lyngba ka Rel”.

“La don biang haduh 20 ngut kiba la thep kyrteng ban ioh tih dewiong, ha kaba la phah ia ka kyrteng jong ki ban ioh jingbit na ka sorkar pdeng bad kane ka long kum ka thong ban pynim jakpoh biang ia kito kiba la shah ktah ka lad kamai lada ioh ban tih dewiong katkum ka juk stad kaba mynta” u la ong.

Kum ban pynkynmaw, kane ka jingkren u Lat ka jylla ha ka sngi sdang ka Dorbar mang tyngka, ka dei ruh dang shen ka la don ka jingjia ba sgnewsih jong ka jingbthei ka par dewiong beain ha Mynsngat-Thangsko ha East Jaintia Hills ba la mih ruh ka jingkylli na ki nongialam liang pyrshah ba la donkam ban don jingshain halor ka jingtih dewiong katkum ka juk stad kaba nym ktah ruh ia ka mei mariang.

U Lat ka jylla u la pynsngew ruh ba ka sorkar jylla ka la dep ban rai ban thung noh ka Judicial Inquiry Commission katkum ka Commission of Inquiry Act ban tohkit bniah halor katei ka jingjia.

U la iathuh ruh kumba 30 ngut ki la duh ia la ka jingim ha ka jingbtei ka par dewiong ha Mynsngat-Thangsko bad 14 ngut ki la shah kem hadien ba la dep ujor haduh 62 tylli ki FIR na ka bynta ban tehlakam ia ka jingdih dewiong beain hapoh ka jylla.

La iathuh ruh ba ki bor sorkar ki la dep ruh ban kurup haduh 15,224.72 metric tonnes u dewiong ba la dep tih  bad nalor kata la ioh kurup ruh 25.5 kg u gelatine bad 74 tylli ki Detenotor. Nalor kata la phah tohkit r uh lyngba ka special investigation team (SIT)  ba la pynmih hukum da ka Director General of Police (DGP) halor kane ka jingbthei ka par dewiong khnang ban lap ia ka jingshisha bad ruh ban leh katkum ki kyndon jong ka ain.