Nongpoh, Rymphang 14: Ka Winter School ba 21 sngi ba kyrshan da ka ICAR halor ka phang “Advances in Cutting-Edge Allele Mining and Bioinformatics Tools and Techniques for Skill Development in Efficient and Tailored Crop Improvement” ka la kut noh ha ka 13 tarik u Rymphang 2026 ha Conference Hall, Guest House jong ka College of Post Graduate Studies in Agricultural Sciences (CPGSAS), ha Umiam.

Ïa kane ka prokram la sdang naduh 24 tarik Kyllalyngkot haduh 13 tarik Rymphang, ha kaba ki riewstad na kylleng ka ri India ki la wan ban shim bynta ban kyntiew ïa ka jingstad bad jingïoh jinghikai halor ki buit thymmai kumno ban pynbha bad pynroi ïaki jingthung jingtep, katkum ka jingdonkam bad ka juk stad mynta.

Ha kane ka sngi ka jingpynkut la pynkup burom ruh ïaki riewstad na 10 tylli ki jylla ka ri India kiba la wan shim bynta ha kane ka prokram ha kaba u Dr. A.K. Mohanty, Director ka ICAR-ATARI, Zone VII, Umiam u la wan ban shim bynta kum u kongsan haka jingdonlang u Dr. Ng. Tombisana Meetei, Course Coordinator, u Dr. Ram Singh, Dean COA & In-charge SSS CPGSAS, u Dr. Pranab Dutta, Chairman SCP CPGSAS, A. Pattanayak, Former Director ka ICAR-VPKAS bad ICAR-IIAB, u Dr. D. Thakuria, Dean CPGSAS bad u Prof. K. Noren Singh, Course Coordinator bad In-charge School of Crop Improvement, CPGSAS.

Ha kane ka sngi la sam ruh ïa ki certificate sha baroh ki nongshim bynta kiba la pyndep ïa kane ka jinghikai kaba 21 sngi.

Haba kren kum u kongsan, u Dr. Mohanty u la ai jingïaroh ïa ki nongshim bynta baroh kiba la trei shitom ha kane ka jinghikai kaba 21 sngi. U la ong ba ka certificate kam dei tang ka dak jong ka jingïoh jinghikai hynrei ka dei ruh ka jingkitkhlieh ban pyndonkam hok ïa ka jingstad kaba la ioh na kane ka prokram na ka bynta ka bha ka miat jong ki paidbah.

U la kdew ruh ba kawei na ki jingeh kiba mih mynta ka long ban pynmih ïaki symbai naduh ki jingthung, ki dohka, ka rep ka riang bad kumta ter ter kumta ka long kaba donkam bad kongsan ban pyndonkam da ki buit thymmai katkum ka jingstad mynta ban pynroi ïaki jait jingthung naka bynta ka jingmyntoi ki paidbah khamtam ki nongrep ryngkat ka jingïakhun ïaka jingkylla jong ka mariang.

Lyngba kane ka Winter School kan wanrah ka jingtip ba thymmai ban pynkhaiñ ïaka jingpynroi ïaki jait jingthung bad kiba bha tam naka bynta ka jingmyntoi ki paidbah haka jylla bad ka ri baroh kawei.