Shillong, Ïaiong 17: Kum ka thong ban ïarap kyrpang ïa ki nongrep ban kyntiew ïa ki kam  rep ki kam riang kiba ai jingmyntoi bad kiba kyntiew ïa ka ioh ka kot ki nongrep, ka Khasi Jaintia Farmers Association ka la phah da ka dorkhas sha u Block Development Officer ka Umsning C&RD Block na ka bynta ban pan ki jingiap ne ki lad ki lynti lyngba ka sorkar na ka bynta ka jingdonkam ki nongrep.

Ha ka jingïalam u president u Bah K. Kurbah bad u General Secretary u Bah Dvone ryngkat kiwei ki dkhot na Mawhati bad Sohpdok  ki la kynduh ïa u BDO ka Umsning ban pan ka jingïarap na ka bynta ka jingdonkam ki nongrep.

“Ngi la kyrpad ïa u BDO ban wan rah ïa ki symbai jingthung kiba don ka dor ka mur kum u Symbai Elaichi bad ban ai ruh ki riew shemphang kiba tip kham bha ban batai halor ka rukom rep, khnang ba kane kan dang lah ban kyntiew ïa ka kamai kajih ki nongrep” ong u Bah Kurbah.

“Kane ka seng nongrep ka kyrpad ruh ban pynioh symbai Syieng kiba ïa dei ban rep ha kane ka thain bad ki dawai ban ïada na ki khniang, nalor kata, ki la pynpaw ruh ba ki nongrep ki donkam ïa ki tiar na ka bynta ban rep ban riang kiba lah ban ïada na ka jinghiar thma ki khniang ba ki nongrep ki ju kynduh jingeh” ong u Secretary u bah Dvone.

Shuh shuh, ki la pynpaw ruh ba ka Seng ka sngewkmen ba na ka liang u BDO ka Umsning u la kular ban shim khia ïa kitei ki mat ba la rah da ka seng bad ruh ban ai ka jingïatrei rygnkat ryngkat naka bynta ka jingmyntoi ki nongrep ha ka rep ka riang.