Shillong, Ïaiong 17: Hadien bala pynkit noh ïa u Chairman ka Green Tech Foundation (GTF) Meghalaya u Bah H Bansiewdor Nonglang sha Civil Hospital Shillong, naka liang u Secretary General u Bah Ritre Lyngdoh, ula pynbna ba un sdang ïaka jingshah thngan khlem pud sngi ha Madan Malki.

Haba kren shaki lad pathai khubor u Bah Ritre ula ong ba kane ka rai ba un sdang ïaka jingshah thngan kadei ban bujli ïa u Chairman namar mynta u dang don hapdeng ka jingpeit ki Doctor ha Civil Hospital.

U Bah Ritre ula ïathuh ba hadien 9 sngi jong ka jingshah thngan khlem pud sngi, ka koit ka khiah jong u Chairman, kam long shuh kaba shngain bad dei namar kane, ki nongïalam bad ki nongkyrshah ka GTF daka jingsngewkhia, kila rai ban rah noh ïa u Chairman sha Civil Hospital Shillong.

“Kum u secretary general jong ka GTF nga la shim ïa ka rai watla nga tip ïa ka jingktah jong ka rai jong nga ba ngan bteng ïa kane ka jingïakhih daka ba shah thngan khlem pud sngi naduh mynta ka janmiet tad haduh ba ka Sorkar kan wan ryngkat bad ka jubab sha ngi da kaba ong ba ka la (Sorkar) pynduh pyndam noh ïaka project jong ka tnat Tourism ha dewlynnong Lumpongdeng” la ong u Bah Ritre.

Haba jubab halor ka jingkular u Myntri Rangbah ban pynshisha halor ka Project ha Lumpongdeng, u Secretary General ka GTF ula ong “U Myntri Rangbah u long u nongaiktien ïaka jingong, nga kular ïa phi, ngan pynthikna ïa phi hynrei kam ju don ei ei kaba thikna shaphang kano kano kaba u kular”.

U Bah Ritre ula ïathuh baka GTF ka la ioh ïa ka shithi na u joint secretary ka Sorkar Jylla ka tnat Tourism ha kaba ki la pynshai, ba kan ym don kano kano ka jingtei ha dewlynnong Lumpongdeng.

“Hynrei ngi kwah ban buh jingkylli, lada ym don jintei, kumno la ai wai (Lease) jaka bad ka Umiam Hotels Private Limited ka ban neh palat 60” ula ong.

“Kam don jingmut bad ka long kaba beij ba ka Sorkar kan aiti ïa ka jaka khlem kano kano ka jingthmu, ka Sorkar ka hap ban pynshai namar kane ka mat kam dei shuh tang ka mat jong ka GTF, hynrei ka dei ka mat jong ka imlang sahlang jong ka jylla Meghalaya baroh kawei” ula bynrap.

U Secretary ka GTF, ula ong baka Forum ka kloi ban wan shaka meij ïakren hynrei ka Sorkar kadei ban ai daka jingthoh.