Nongpoh, Iaïong 17: U SDO ka Patharkhmah Civil Sub Division mynta ka sngi u la khot hajir syndon ia ki nongialam ka Hima Sohiong bad ruh ia u Samla u Noreshor Timung na ka Shnong Amreng ba hap ha Jirang Constituency, uba la shah shoh ha ki nongtrei ka tnad Forest na Assam haka 30 tarik u Naitung 2025, kaba dei halor ka jingbthah ka National Human Right Commission, kaba dei ruh hadien ba ka Shnat Hima Nongwah Mawtamur, Sohiong Lyngdohship ka la ujor sha ka National Human Right Commision ha kaba ia dei bad katei ka jingjia.

Kum ban pynkynmaw uwei u samla bala tip kyrteng kum u Noreshor Timung naka shnong Garo Banga (Amreng) na ka shnong khappud bad ka jylla Assam ba hap ha Jirang Constituency bad uba dei ruh u nonghikai skul u la shah kem haki bor pahara ka tnad Forest na Assam haka 30 tarik Naitung 2025 naka shnong Umshalani bad ha katei ka sngi ym tang ba ki kem bad ki la patan jubor bad shoh dusmon haduh ba u la mynsaw bad rah ia sha Lokhra.

Haba kren sha ki Nongthoh khubor u Bah Rastingwell Thabah Chairman ka Hima Sohiong bad u Bah PL Thabah Lyngdoh Sohiong ki la ong ba mynta ka sngi ki la leit ban ia kynduh ia u SDO ka Patharkhmah Civil Sub Division hadien ba ki la shah khot hajir ba ka Hima Sohiong ka la ujor syndon shaduh sha ka National Human Right Commission ban pyrshah halor ki kam thombor ki bor pahara ka tnad Forest na Assam kiba la shoh dusmon ia u small ba kum ka hima ka sngewkhia bad ka don kata ka jingkitkhlieh halor ki jingshah thombor ki borew kiba shong bas ah ha khappud Assam.

Ki la ong ruh kum kine  ki jingshah thombor ki paidbah ha khappud ka Assam ka dei kaba la jia na ka por sha ka por ha kaba ki nongshong shnong ki hap ba shong ban sah hapdeng ka jingtieng ka jingyier bad dei namar kane ka daw ban pynioh ia ka hok kaba ki shah thombor ka Hima ka la ujor syndon sha ka National Human Right Commission kaba la ai por 4 taiew ia ka bor District ban pyndep ia ka jintohkit halor katei ka jingjia ba ka Hima ka la don ruh ia ki sakhi satar naduh ki dur, ki durkhih bad ki slip dawai ba la aiti sha ka bor District ba la leit sumar na ka jingmynsaw utei u samla ha ka jingshah bom shah shoh ha ki bor pahara ka tnad Forest na Assam.

Shuh shuh, ki la ong ruh kum ka Hima ka shim khia ia kane ka kam ban ujor sha katei ka Commission ka dei namar ba ka Hima kam kwah ba ka Assam kan shu thombor katba mon ia ki jaka ki puta bad ruh ia ki nongshong shnong kiba shong basah ha khappud.