Nongpoh, Iaïong 17: Ka Synjuk ki Rangbah Shnong Ri-Bhoi mynta ka sngi kala pynpaw ka jingsngewkhia haka jingïadei jong ki shnong bad ka Hima Mylliem namar kumba long mynta kam don shuh ka jingïadei kaba jan, hynrei tang ka jingshah khrong khajna ki khun ki hajar ka them Ri-Bhoi kiba hap ha katei ka Hima.

Haba kren sha ki lad pathai khubor naka liang u Bah BB Makdoh Chairman ka Synjuk ki Rangbah Shnong u la ong ka jingïadei ba jan bad ka Hima Mylliem kam don shuh, hynrei lada kheiñ ka jingnohsynñiang ka them Ri-Bhoi sha ka Hima naduh ki iew ki hat, ki khyrdop, ka iew masi kan nym duna ïaka 50% hynrei kaba sngewsih ka long naka bynta ki khun ki hajar ka Ri-Bhoi kim ju iohi dur ïa uta u syiem ka Hima Mylliem ba un wan peit wan jngoh ïangi, nai kren lei lei ïaka jingnoh synñiang jong ka Hima Mylliem sha ka them Ri-Bhoi.

U la ong ruh kaei kaba ngi angnud ka long ba tang uwei u khulom, kawei ka ben skul ban noh synñiang sha ki skul ne kiba duk ba shitom kan long ka jingkhyrkhu ïaka Ri-Bhoi hynrei kumba long mynta ngi long tang ki langkñia kiba hap ban siew khajna ïaki mar rep mar riang, te shaei kata ka jingsynshar kaba khuid ha kaba ïadei bad ka Hima.

“Kat kine ki jingmih bad kiba ngi la noh synñiang, kat kine ki jingshah lehbeiñ ngi sngewdei ban pynbna paidbah ba ka Ri-Bhoi ka dei ban don noh u nongmihkhmat sha ka Hima Mylliem bad ban don bynta ruh haka jingjied ïa u Syiem, ka lah ban nym don haka aiñ hynrei ïaka aiñ lah ban pynkylla” la ong u Bah BB Makdoh da kaba bynrap ruh ba uta uba dei peit ïaka Ri-Bhoi lada um tip ïaka riti ka dustur kan myntoi aiu ban long nongmihkhmat ka jingkwah jong ngi nangne shakhmat ka long ban don uwei u briew ban mihkhmat sha ka Hima ban peit ïaka Ri-Bhoi namar u trai te u trai u tip lut ïaka eh ka shon ka kolshor ka riti ka dustur.

Shuh shuh u la ong ruh ba naduh ki por ba mynshuwa ngi la ïakhih bad ïakhun ïa kane kala don ka por ba u lat ka jylla u la mynjur ïa kane hynrei mynta kala jah noh bad mynta kala dei ka por ban kyrpad ïaka Hima lada ka long kumno kumno ban don ka jingïakren ban ioh noh u nongmihkhmat na Ri-Bhoi ban jied hi da u Syiem ne ki Longsan bad halor kane ngin sa leit ruh ban kynduh ïa u CEM ka District Council, u la bynrap.