Shillong, April 18: Kum kawei ka thong ban ai ka jingïatrei lang na ka bynta ban tei na ka bynta ka bha ka miat jong ka ri lyngba ka pule ka puthi, ka Assam Royal Gloval University (RGU) ka la ïa soi da ka soskular (MOU) bad ka tnad Pulit Meghalaya ban don kata ka jingïatrei lang ha kaba kyntiew ïa ka ri.

Ka Royal Global University Guwhati ka la ïa soi ïa kane ka Soskular bad ka tnad Pulit Meghalaya hynnin ka sngi ha ka ophis treikam ka Director General of Police ha Nongbah Shillong ha ryngkat ka jingdon lang ki nongmihkhmat na ka tnad Pulit bad na ka Royal Global University.

Ïa kane ka soskular la soi da ka Kong Idashisha Nongrang, kaba dei ka IPS bad ka Director General of Police ka Meghalaya na ka liang ka tnad Pulit bad u Dr. D.N Singh uba dei u Registrar (Academic na ka Royal Global University.

Haba kren halor kane ka jingïasoi ïa ka soskular, ka DGP ka Meghalaya ka Kong Idashisha Nongrang ka la ong ba kane ka jingïasoi soskular ka dei shi bynta ban don ka jingïatrei lang na ka bynta ban kyntiew ïa ka bha ka miat jong ki jylla bad ka ri bad kan ai ruh ka jingmyntoi na ka bynta ka imlang ka sahlang ha ka liang ka pule ka puthi.

Ka DGP ka la ong ruh ba kane ka jingïasoi soskular bad ka Royal Global University kan ai jingmyntoi ruh ïa ki khun ki kti ki Pulit ka Meghalaya bad wat ki Pulit kiba don jingthmu ban pule kham shaneng ha ki jingpule. Ka la ong ruh ba kane ka jingasoi soskular kan ai jingmyntoi ruh ïa ki Samla pule na Meghalaya ba kin ioh lad ruh ban pule ha katei ka skulbah.

Shuh shuh, ka la bynrap ruh da kaba ong, ba kane ka jingïatrei lang hapdeng ka tnad Pulit na Meghalaya bad ka Royal Global University kan ïarap shibun ïa  ki khun ki kti ki Pulit na Meghalaya bad ka kyrpad ruh ïa ki samla pule ba kin pule hatei ka skulbah kaba la dei kawei na ka skulbah kaba la kiew ba ha kine ki sngi bad kaba don ruh shibun ki tnad pule ba la wan ban pule na kylleng ka ri.

Kum ban pynpaw, lyngba kane ka jingïasoi soskular, ka Royal Global University kan la rai ruh ban wan rah kyrpang da ka Scholarship lyngba ka -Royal Shaurya and Royal Suraksha—ban ai ïa kata ka jingnang jingstad kaba paka na ka bynta khun ki kti jong ki Pulit na Meghalaya bad ruh ki Pulit.