Shillong, Ïaïong 18: Ka Jaintia National Council (JNC) Central Executive Committee ha ka jingïalam u President u Bah Sambormi ha ka 17 tarik u Ïaïong ki la leit ban kynduh ïa u Bah Wankit Pohsna uba dei u General Secretary ka Sate BJP, kaba dei ruh hadien ba ka seng ka la dep ban phah ïa ka dorkhas ha ka BJP ha kaba ïa dei bad ki mat jong ki par dewiong ne ki kam tih dewiong ha rilum Jaintia bad wat haka jylla.

Haba kren sha ki lad pathai khubor u President ka JNC u Bah Sambormi Lyngdoh u laong ba naduh ba ka supreme Court ha u snem 2019 ka la ailad ïa ki par dewiong katkum ka MMDR Act bad ka JNC ka sngewkhia ba kane ka jingailad kam ïahap dur satia halor ka rukom bat khyndew ne ka hok longtrai man trai ha ki jaka ki puta.

U la ong ruh ba ha ka 7 tarik u ïaïong 2926 la pynlong ïa ka jingïalang paidbah ha Khliehriat bad la iohi ba da ki hajar ki trai par dewiong ki la pynpaw ïa ka jingsngewkhia bad dawa ïa kata ka Mining Policy kaba ïa dei dur ba ka rukom long ki jaka ki puta, ka hok long trai ki trai jaka bad ka jinglong jingman jong ka shnong ka thaw.

U la pynpaw ruh ba ka JNC kan dang bteng ban kyrpad ïa kane ka kam tih dewiong ha rilum Jaintia, namar ka dei tang kata ka lad kamai kajih ban ioh jingim ki paidbah bad ka jingkynduh ïa u Bah Pohshna kum u Secretary ka BJP ka long kaba seisoh ha kaba u la kular ban shim khia ban ïa kren sha ka sorkar kmie kaba long ka dak ka jingkyrmen ïa ki paidbah ka rilum Jaintia.

Ngi sngewthuh shai ba ka rai ka Supreme Court ba hap ban bud ryntih ïa ka MMDR bad pynpaw pat katkum ka Para 12(b) ka Sixth Shedule la pynkupbor ïa u President ban pynlait ïa kino kino ki ain ba shna ka parliament kum ka MMDR na ki jaka ba hap ha ka Sixth Schedue. Ka jingpynlait noh ïa ka MMDR khamta na ka bynta ki kam tih dewiong kan ïarap shibun na ka bynta kito kiba ba don ki par dewiong barit, namar kumba long haduh 100 hectare ka SOP kam hap satia halor ki rukom treikam jong ki mynbarim bajah halor kane ka kam tih dewiong, la ong u Bah Lyngdoh.

Ka JNC ka kyrshan ïa ka jingkular ka BJP Meghalaya ban ïakhun tyngeh halor kane ka mat ba shah ktah ki trai muluk ki trai jaka halor ka jingshah khang tih dewiong kaba dei ka mat jingdawa ba la slem bha ha Rilum Jaintia bad wat ha ka jylla Meghalaya bad ka seng ka kyrpad ba kan don ka jingïathir ne ïa kren sani halor kane ka phang bad ym ban pynduh jingkyrmen ïa ki paidbah, u la pynpaw.

“lada ïa ka Article 370 la lah ban pyndam bad ruh ka CAA la lah ban pynlait ha ka jylla Meghalaya, ka jingtih dewiong ruh dei ban lah ban pynlait lada don kata ka jingshim khia da ka sorkar” pynkut u Bah Sambormi Lyngdoh, President ka JNC.