Nongpoh, Jylliew 08: Haba pynlong biang da ka election ban pynthymai biang ïa ki nongïalam shnong ka Shnong Nongpoh na ka bynta ka samoi treikam jong u snem 2025 haduh u snem 2028, ka Dorbar Shnong Nongpoh kum ka Head Quarter ka Ri Bhoi District ka la lah ban pynlong ïa ka Election ban jied ïa u Rangbah Shnong bad Secretary Shnong ba thymmai ha ka sngi Saitjaiñ ha Dorbar Hall, Sajer Nongpoh.
Haba jied ïa u Rangbah Shnong bad u Secretary Shnong la pynlong da ka election bad la pyndonkam ruh da ki Secret Ballot khnang ban pynlong ïa kane ka jingjied ïa u rangbah Shnong bad Secretary Shnong ba kan long kaba khuid kaba suba bad ba kan long kaba ïaid beit ïaid ryntih ban ioh ïa kita ki nongïalam ba thymmai kane ka shnong.
Ha kane ka jingjied rangbah shnong bad Secretary Shnong, ki don 5 ngut ki Kyrtong kiba ïa khun ïa ka kam rangbah shnong ba kynthup ïa u Bah Sylvester Mynsong, u Bah Bul Lyngdoh, u Bah Plielad Tiesoh, u Bah Royal Born Suiting bad u Bah Skhemlang Marai bad na ka bynta ka kam Secretary Shnong ki don 3 ngut ki kyrtong ba kynthup ïa u Bah Anthony Suchiang, u Bah Michael Kharhunai bad u Bah Lambor Thangkhiew.
Ha kane ka election ki don haduh 960 ngut kiba la wan ban thep vote bad u Bah Sylvester Mynsong u la shah jied biang kum u Rangbah Shnong da kaba u la ioh ban khur haduh 308 vote bad u Bah Anthony Suchiang kum u Secretary Shnong ba thymmai u la ioh khur haduh 543 vote bad kine ki ar ngut ki dei ruh ki Rangbah Shnong bad Secretary Shnong barim ba la pynkup bor biang ban ïalam ïa ka shnong na ka bynta ban ai biang ïa ka jingshakri na ka bynta ki paidbah nongshong shnong.
La sakhi lang ruh ha kane ka sngi, da ka jingdon lang u Lyndoh ka Raid Nongpoh u Bah Linus Lyngdoh bad u Myntri ka Hima 12 Lyngdoh, u Bah Stoin Syngkli, kiba la ai ka jingkyrkhu kyrdoh ïa kine ki nongïalam shnong ba thymmai ban kit ban bah ïa ki kam shnong na ka bynta ka bha ka miat bad ka roi ka par jong ka shnong ka thaw.
U Bah Linus Lyngdoh kum u Lyngdoh ka Raid nalor ka kyrkhu kyrdoh, u la kyntu ruh ïa ki nongïalam shnoing ba thymmai bad ruh ki paidbah ban don kata ka jingïatrei lang hapoh ka shnong ka thaw, khnang ba ngin dang lah shuh shuh ban kyntiew ïa ka Shnong Nongpoh kum kawei na ka Shnong kaba long ka pdengbah jong ka Ri Bhoi bad ruh ba kan long ka nuksa babha ïa kiwei ki shnong hapoh ka District bad ka jylla hi baroh kawei.
