Nongpoh, Nailar 01: U Chairman ka NPP Farmers Front u Bah H.M Shangpliang bad u Secretary u Bah Eugene Kurkalang mynta ka sngi ki la wan ban pynskhem ia ki Nongialam ka District NPP Farmers Front bad ka NPP Nongpoh Block Farmers Front ha ka jingialang kaba la long mynta ka sngi ha Dobar Hall Sajer Nongpoh.
Ha kane ka jingialang pynskhem ia ki nongialam ka Farmer’s Front la don ryngkat u working President ka Nongpoh NPP Block u bah Rayonald Kharkamni, President ka Nongpoh NPP block u bah Henry Nongrum, u general Secretary ka NPP Nongpoh Block u bah Bishar Tmung, lem bad kiwei de ki nongialam. Da ki spah ngut ki nongrep naka Nongpoh constituency ha kane ka jingpynskhem ia ki nongialam ka NPP Farmer’s Front.
Ki nongialam kiba la pynskhem bad pynkup bor mynta ka sngi ki kynthup ia u Bah Daminot Sylliang kum u President ka NPP District Farmers Wing, u Cheriff Shylla kum u Secretary bad ha Nongpoh Block la jied ia u Bah Phis Narlong kum u President ka Nongpoh NPP farmers Front bad u Bah Augustine Nongrum kum u Secretary.
Ha kane ka sngi, na ka liang u Bah H.M Shangpliang kum u Chairman bad u Bah Eugene Kurkalang kum u Secretary, ki la pynshai sha ki nongrep, ba ka thong ba ka NPP ka la buh ia kane ka Farmers Front, ka dei ka ban iarap kyrpang na ka bynta ki nongrep hapoh ka jylla. Lyngba kane ka Farmers Front kin lum jingtip ia ki nongrep bad ki jingeh kaba ki ia kynduh ha ka jylla bad nangta ki sa thaw ia ki lad ki lynti ban iarap kyrpang na ka bynta ki nongrep.
U Bah Shangpliang u la kren ruh ba ka sorkar NPP ka dei ka sorkar kaba phai khmat sha ki nongrep ha kaba ha jingialam u Myntri Rangbah u Conrad K. Sangma bad u Bah Prestone Tynsong kum u symbut myntri ki la buh ia kane ka shnat treikam ka long ban phai khmat kyrpang tang na ka bynta ban iarap kyrpang ia ki nongrep da kaba kin thaw ia ki skhim bapher bapher ban myntoi ki nongrep.
Shuh shuh, u la ong ruh ka sorkar NPP ka la thaw ruh ia ka CM Focus bad ka CM assure, kine ki dei ki skhim kyrpang ba la buh na ka bynta ki nongrep bad nalor kata ka sorkar ym tang ba kan ai ia kita ki lad jingiarap sha ki nongrep, hynrei kin thaw lad ruh ban don kata ka iew ka hat namar kum ki nongrep lada ym don dor ki mar ki mata kin nym ioh jingmyntoi satia, u la bynrap.
