Nongpoh, Nailar 06: Kum ka sienjam ban pyniar ia u Jylli treikam na bynta ka ri bad ka Jaidbynriew Khasi khamtam ki paidbah nongshong shnong kiba shong ba sah ha ki thaiñ khappud kiba donkam ban ioh ia ka jingiada jong ki shipai ka ri, hynnin ka sngi na ka liang ka Khasi Students Union, North Khasi Hills District ka la leit ban pynkha syndon da ka shnat treikam ha ka thaiñ khappud jong ka Ri Bhoi Sepngi ia kaba la jer kyrteng da ka KSU Western Border Area.
La sakhi ruh ha kane ka sngi ba la pynskhem bad pynbam smai ia kitei ki nongialam ha ka jingialang kaba la long ha ïingbordar jong ka Shnong Patharkhmah, da ka jingdon lang u Samla Pynkmenlang Sanmit, Education Secratary jong ka KSU, Sengkmie ha ka jingiadonlang ruh da u Samla Eric Nongkynrieh, Sport Secretary ka KSU Sengkmie, u samla Ferdynald Kharkamni, President ka KSU North Khasi Hills District, u samla Stevenson Kharkrang, Assistant Secretary ka KSU North Khasi Hills District nalor kiwei kiwei ki nongialam ka KSU Sengkmie bad na ka North Khasi Hills District.
Haba kren ha kane ka sngi, na ka liang u samla Pynskhemlang Sanmit, u la pynpaw ia ka jingkmen kaba khraw ba ki khun samla na ka thaiñ Ri Bhoi Sepngi ki don shisha ia kata ka mynsiem ban mih shakhmat ban ieng ban shakri ia la ki nongshong shnong ha kane ka thain kaba dei ka thain kaba hap ha khappud bad ka Assam da ka jingsngewkhia halor Shibun ki jingeh ba ki la dep ban mad khamtam na ka jingkyntur pud bad kiwei kiwei ki jingeh.
U la ong bad kyntu ruh, ba kum ki shipai ka KSU kumba ki thrang ban ieng ialeh na bynta ka dawbah ki briew Lajong bad ka Jaidbynriew ki dei ban iaineh skhem kumba ki don ia ka nongrim bad ba kim dei da leilei ruh pat ban kynrandien kumba ki la shim ia ka jingbam smai namar kane kan kyrtoh kylla.
Da kaba bynrap ruh, haba phi rung sha ka seng KSU phi dei ban kiar pat horkit hordang na kaba don bynta ha kino kino ki kam kiba pynthame ne pynthohbria ia ka seng, bynrap u samla Sanmit ha ka jingkren ai mynsiem ia ki nongialam ka KSU Western Border Area.
