Nongpoh, Nailur 07: U Charles Marngar, MLA Mawhati, mynta ka sngi, u la leit ban pyllait paidbah ia ka kali kit nongpang jong ka Dorbar Shnong Khliehumstem, ia kaba la thied lyngba ka skim Chief Minister’s Special Development Fund (CMSDF).
Ia katei ka kali kit nongpang, la pyllait paidbah ha shnong Khliehumstem bad ha katei ka sngi ba la pyllait paidbah, la sakhi da ka jingdon ka Anju R Marak, District Medical and Health Officer (DMHO) of Ri Bhoi, E Tlang, Doctor In-Charge of Mawlasnai CHC, u Bah F. Teron, rangbah shnong Khliehumstem lem bad shibun ki riew rangbah jong katei ka thain.
Haba kren ha katei ka sngi, u Bah Charles Marngar, u la ai ka jingiaroh ia u Myntri Rangbah ka sorkar jylla, namar ba u la pynioh khnang ia katei ka kali kit nongpang sha ka shnong Khliehumstem, kaba la long shisha kaba ai jingmyntoi ym tang ia ki paidbah hapoh katei ka shnong, hynrei ka la long kaba la ai jingmyntoi ia ki paidbah na ki shnong ba marjan bad ka Khliehumstem, khamtam eh haba don kino kino kiba pang ba shitom bad kiba donkam ban poi kyrkieh sha ki jaka sumar.
La ioh ruh ia ka jingkren na ki riew rangbah na katei ka shnong, kiba la pynpaw ia ka jingsngewkmen ba ki la ioh ia katei ka kali kit nongpang bad ka ban ai jingmyntoi na bynta jong kito kiba donkam ia ki kali kit nongpang. Ha kajuh ruh ka por ki la ai ka jingkhublei ia u MLA bad ia u Myntri Rangbah jong ka sorkar jylla ruh kumjuh.
