Shillong, Nailar 18: U Chairman ka NESO u Bah Samuel Jyrwa u la pynpaw ba ka jingïakhih ia kaba la pynlong ha baroh ki Nongbah jong ki Jylla Shathei Lammihngi (North East) ka long ban pynbor ïaki Sorkar Jylla bad Sorkar Pdeng ban shim ki sienjam ba kyrkieh bad thikna ban shna ki ain ban iada naka jingwan buhai shnong beain ki briew shapoh ka thain.
U Bah Samuel ula ong ba ka jinglong jingman hapoh Ri Bangladesh bad ka jingiai bteng ka Sorkar Assam ban kyndang iaki ba sah beain, kan wanrah jingkthah iaka jingbun briew sha kiwei ki Jylla ka thaih khamtam lyngba ka jingwan buhai shnong beaiñ ki briew na Bangladesh.
U la kdew ba ka jingwan buhai shnong be-aiñ ka dei ka jingeh kaba neh naduh ba la ïoh ïa ka jinglaitluid ka ri India bad ka la wanrah ïa ka jingkulmar bad ka jingïakhih paidbah ha ki jylla kum ka Assam bad Meghalaya.
Nalor kane ula ban jur ba ym lah shuh ban iehnoh ia ka jinglong jingman bad u la khot ia ki lad ki lynti kiba tyngeh ban weng ia katei ka jingeh.
Naka liang u general secretary ka KSU u samla Donald V Thabah u la pynpaw biang ia kine ki jingsngewkhia, da kaba kyntu ban pyntreikam ia ki ain kiba pyrkhing ban khanglad ia ka jingwan tuid khlem da tehlakam jong ki briew kiba wan rung beain.
