Shillong, Nailar 19: Ka Meghalaya State Planning Board (MSPB) mynta ka sngi kala pynpaw ka jingbynniaw haba iadei bad ka jingslem ban pyndep iaka surok Shillong-Dawki kynthup iaka Jingkieng Umshyrpi bad ka Flyover ha Pomlum.
Ia kane ka MSPB kala pynsngew hadien ka jingleit jurip iaka jingpyntrei iaka surok Four Lane naduh Jingkieng Umshyrpi shaduh ka Flyover kaba don ha Pomlum.
Ha kane ka jingleit jurip la ialam da u Chairman ka MSPB u Bah Metbah Lyngdoh haka jingdonlang kiwei ki dkhot ba kynthup ia u MLA u Olan Sing Suin bad u Bah Beyongstar Kubar, ki ophisar ka NHIDCL, NHAI, PWD, bad na ka tnad PHE ka Sorkar Jylla.
Haba kren shaki lad pathai khubor u Chairman ka MSPB u Bah Metbah Lyngdoh ula ong ba watla ki kam ki iaid beit iaid ryntih ban pyndep iaka surok Shillong-Dawki kynthup ka Jingkieng thymmai ha Umshyrpi bad ka Flyover kaba don ha Pomlum hynrei kumba iohi mynta, dang donkam shuh shuh ban pynsted khnang ban pyndep ia kane ka Project haka por bala buh.
U Bah Metbah ula ong ba haka jingleit jurip la shem baka kynroh ba don sha shilliang ka Jingkieng Umshyrpi thymmai ka long ka bym shngain bad ka Planning Board kala bthah iaka NHIDCL ban pynthikna ba iaka kynroh dei ban tei thymmai.
Ula iathuh ba haka jingleit jurip la shem bad ki don ki jyrwit jyrwat kiba pynslem iaka project ban pyndep kynthup ka jingslem ka tnat PHE ka Sorkar Jylla ban weng iaki pipe um kiba don haka jaka ba iaid ka surok.
