Nongpoh, Nailar 26: Ban phai khmat kyrpang sha ki longïing ki baduk kiba rangli ha ka imlang ka sahlang, kawei na ka kynhun ki samla ba la ai kyrteng ‘ka Kynhun Ban Kner’ ka la pynshna syndon da kawei ka ïing ia ka Longïing jong ka Kong Wanphai Kshiar ba shong basah ha Sajer, Nongpoh.
Kane ka kynhun ka la sdang ban shna ia kane ka ïing naduh u snem ba la dep da ka jingiasynñiang lang ki para samla kiba don mynsiem ban iarap na ka bynta ki longïing ki baduk ba rangli bad dei haduh mynta ka sngi hadien ba la dep ban shna ia kane ka ïing la aiti noh sha katei ka longïing ban shong ban sah bad ban long kum kata ka jaka kaba kin ioh ban thiah ban dem bad ban shong ban sah kumba long lem kiwei ki longïing.
Ia kane ka ïing la wan ban plie da ka Kong Rona Khymdeit MDC ka Nongpoh kum ka kongsan bad la don ryngkat u Bah Lastferrius Marngar u dkhot nongialam ka Shnong Nongpoh, u Bah Rapbanjer Sohtun kum u nongialam katei ka kynhun lem bad kiwei kiwei ki dkhot ka kynhun ha ryngkat ka jingdon lang ka Kong Wanphai Kshiar bad ka ïing ka sem kiba la ioh pdiang ia kane ka ïing ba la pynshna sngewbha da katei ka kynhun.
Kane ka Kynhun Ban Kner, ka dei ka kynhun ba la ia seng shi paralok da kawei ka thong ban ban ai ka jingshakri bad ban iarap sha ka imlang ka sahlang kaba donkam jingiarap khamtam ki baduk ba shitom ba kane ka kynhun ha ka sien jam kaba nyngkong ka la lah ban pynshna da ka ïing sha kane ka longïing kaba donkam shisha ia ka jingiarap bad ka longïing ka mad jingeh na ka jingban ka jingduk jingkyrduh.
Haba kren ruh ha kane ka sngi, ka Kong Rona Khymdeit kum ka MDC ka la ai khublei ia kitei ki samla, ha kaba lyngba Ka Kynhun Ban Kner, ki la pynshna ia kane ka ïing, kaba long kawei na ka kam ba bha ba ki la leh bad ba dei ruh ban ai jingiaroh halor kine ki kam ba bha.
“Ka jingdon kum kine ki samla kan long shisha ka jingmyntoi na ka bynta ki ïing ki sem kiba duk ba kyrduh” ong ka Kong Rona Khymdeit bad bynrap ruh da kaba ong ba kum ka nongmihkhamt ka khmih lynti ban dang mih shibun ki samla kiba don shisha ka jingkitkhlieh na ka bynta ka imlang ka sahlang bad haba don kum kine ki kynhun ba kylluid mynsiem kan long shisha ka jingkyrkhu ia kiba bun ki longïing baduk ba jynjar ha ka imlang ka sahalng” ka la bynrap.
