Nongpoh, Nailur 04: Ka kynhun ki nongrep ha Ri Bhoi Sepngi bad kaba la tip kum ka Jirang Organic Agro Farmer Producer Company, kaba dei ruh ka kynhun kaba la lah ban pynpoi Sohniamtra sha Dubai, mynta ka kynti ka la ïoh pat ban plie noh ia ka Karkhana kaba la tip kum ka Meghalaya’s First Aseptic Pulping Unit and Mandarin Sorting, Grading & Waxing Unit, ka Karkhana ka ban sa pynmih ia shibun ki jait Umsoh bapher bapher.
Ia katei Karkhana jong ka Jirang FPC, ka dei kaba don hapoh ka shnong Jirang, la tei ha ka jinglut kaba la poi T. 1.50 klur, ia kaba la leit ban plie paidbah da ka Kong Ampareen Lyngdoh, Myntri ka tnat ki kam rep kam kum ka Kongsan, ha ryngkat ka jingdon u Bah Sosthenes Sohtun, MLA Jirang, u Abhilash Baranwal, Deputy Commissioner Ri Bhoi, ka Kong Ibalahun Thangkhiew, CEO Jirang FPC, ki ophisar na ka Agriculture, Horticulture, ki nongialam Shnong lem bad ki nongrep jong ka thaiñ Jirang.
Katei ka Karkhana ba la plie mynta ka sngi, ka dei kaba la don naduh ka jaka ban buh bha ia ki soh ki pai ne ki mar rep, ka jaka ban tylliat bad ban pynmih Umsoh lem bad kiwei ki bynta, kata shwa ban shalan sha kiwei pat ki jaka.
Katei ka Jirang FPC, ka dei kaba la seng ha u snem 2017 bad kat haduh mynta ki don kumba 434, ha kaba lyngba katei ka Karkhana ba la plie mynta ka sngi, ki nongrep ki lah ban pynpoi ia ki mar rep jong ki, kiba long kum u Sohniamtra, ka Kait, u Sohtrun, u Sying lem kiwei ki mar rep, ha kaba katei ka Karkhana kan shim ha ka dor kaba biang bad ka ban long ka jingkyrkhu na bynta ki paid nongrep.
Kumba ka long mynta, katei ka Jirang FPC ka don hapdeng ka jingiatehlok bad ka Lulu Group International, kata khnang ban pynsuk ia ka rukom ban shalan ia ki mar kiba mih na katei ka Jirang FPC sha kiwei ki jylla bad shabar ri ruh kumjuh.
Ka Kong Ampareen Lyngdoh, haba kren ha katei ka sngi, ka la pynpaw ia ka jingkmen ba ka la ïoh ban iashimbynta ha katei ka sngi lehkmen ki nongrep kiba don ha kynhun jong ka Jirang FPC, namar lyngba katei ka sngi, ba la lah ban plie ia katei ka Karkhana, kan da long shisha kaba ai jingmyntoi ia ki paid nongrep ha ka thain Ri Bhoi Sepngi hi baroh kawei.
