Nongpoh, Risaw 01:Ka Ri Bhoi District Cricket Association (RBDCA) mynta ka sngi ka la pynkup burom ia u Bah Sosthenes Sohtun, uba bat kum u Adviser ha kane ka Association na ka bynta ban kyntiew ia ki kam ialehkai Cricket ha Ri Bhoi bad kane ka jingpynkup burom ka long ruh shi bynta ban pynpaw ruh ia ka jingsarong ba ka sorkar jylla ka la jied ruh ia u ban long kum u myntri sorkar ba bat haduh lai tylli ki tnat sorkar kata ka C&RD, GAD bad ka SAD.

Ia kane ka jingpynkup burom la pynlong ha madan Cricket ka Ri Bhoi District Cricket Association kaba don ha Nongkhrah, ha kaba la sakhi lang ruh da ka jingdon lang ka Kong Rona Khymdeit MDC ka Nongpoh, u President ka RBDCA bad uba dei u Honorary Secretary ka MCA u Bah Rayonald Kharkamni, u Vice President u Bah Ferdynald Kharkamni, u Bah Michael Kharhunai General Secretary u Rubul Ali officer In-charge ka tnad Traffic na Nongpoh lem bad kiwe kiwei de.

Kane ka jingpynkup burom ka long ruh ban ai burom ia une u rangbah uba bat ia ka kyrdan nongialam kum u Adviser bad ruh ban pynpaw ia ka jingkmen ba u dei ruh u nongmihkhmat na Ri Bhoi uba la ioh rung sha ka jylli ban don lang ha ka kynhun ki Myntri sorkar   na ka bynta ban shakri ia ki paidbah ha kane ka District bad ha ka jylla hi baroh kawei.

Ha kane ka sngi la ai jingkren ruh da u Bah Sosthenes Sohtun ha kaba kum u myntri sorkar u la ai ka jingkhublei ia ka Association kaba la pynkup burom ia u  hadien ba u la shah jied kum u myntri sorkar bad ha kajuh ka por ruh u ai ka jingkular ban don ka jingiatrei lang ban kyntiew ym tang ia ki kam ialehkai Cricket bad ban kyntiew ne saindur ia baroh ki kam pynroi ne ki jingmyntoi ba dei ban ioh ki paidbah ha ka jylla.