Shillong, Naiwieng 10: Da ki phew hajar ngut ki paid riewngeit jong ka Balang Catholic naki Parish bad ki Balang shnong bapher bapher na 3 tylli ki jylla niambah ka Shillong ba kynthup ia ka Nongstoin bad Jowai Archdiocese haka sngi u Blei jong ka 9 tarik Naiwieng 2025 kila tuid ban shim bynta haka proseshon Iukharist kabala ju pynlong man u snem ha iing manebah Cathedral, Laitumkhrah.

Ha kane ka sngi la sdang da ka jingtyrwa ïaka mass bakhuid haka por mynstep da u Bishop Bernard Laloo, Auxiliary Bishop ka Shillong Archdiocese ha ryngkat ka jingdon lang u Most Rev Archbishop Victor Lyngdoh, Fr. Pius Shadap, Vicar General, ki Lyngdoh, ki riewniam, ki brother bad sister ha ryngkat ki phew hajar ngut ki paid riewngeit.

U Bernard Laloo Auxiliary Bishop ka Shillong Archdiocese haba kren ha kane ka sngi u la kyntu bad u la sneng la kraw ïaki paid riewngeit bala khot iangi baroh kiba ioh ïa ka jingaiei jong u Blei lyngba ka Iukharist bakhuid ba ngin sam lem ïa ka jingaiei jong u Blei kaba tuid  lyngba jong ngi sha kiwei pat lyngba ki kam babha, ki kam isynei, bad khamtam ban phaikhmat ban kyrshan ïa kiba duk ba rangli bad kiba shah iehnoh bein.

Ki paid riewngeit hadien ka kylla step kila tuid pat ban shim bynta sa haka jingïaid proseshon Iukharist bakhuid ryngkat ki jingduwai bad ki jingrwai ïaroh ïa u Blei bad ruh ban shim bynta haka jingmane sakramen bala ïalam da u Most Rev Archbishop Victor Lyngdoh.