Nongpoh, Naiwieng 12: Hadien ba la pynkut noh ia kawei na ka rynsan ia pyni sap ki khun samla ha Ri Bhoi District kaba la tip kum ka Block Level  Chief Minister, Meghalaya Youth Engagement Programme 2025 kaba dei ka prokram ha ki Block bapher bapher bad mynta ka sngi ka ophis u District Sports Officer ka Ri Bhoi u la sdang biang ia kane ka juh ka prokram ba la tip pat kum ka 4th District Level, Chief Minister, Meghalaya Youth Engagement Programme 2025 kaba de ha ka District Level ba la pynlong ha Parish Hall Nongpoh.

U MLA ka Nongpoh u Bah Mayral Born Syiem kum u kongsan ula wan ban plie paidbah ia kane ka prorkam bad la sakhi lang ruh da ka jingdon lang u Deputy Commissioner ka Ri Bhoi u Abhilash Baranwal, u Additional Superintendent of Police ka Ri Bhoi u Orville Massar, u District Sports Officer ka Ri Bhoi u Bah Bobby L Nongbet bad kynthup kiwie kiwei ki ophisar na ka District.

Kum ban pynpaw, kane ka lympung ia pyni sap ki samla ka dei ka lympung kaba kin sei madan ia ki sap ki phong kypang jong ki, naduh ka rwai ka siaw, ka put ka tem bad kiwei kiwei ki jingiakop bad kito kiba jop ha kane ka Dsitrict Level kin mihkhmat pat ia ka District sha ka State Level.

Haba kren kum u kongsan ha kane ka sngi, u Bah Mayral bOrn Syiem u la ong ba u dap da ka mynsiem jong ka jingkmen ban iohi ba naduh ka Block Level, ki samla dong bad ka thain Ri Bhoi ki la don shisha ia kata ka sap kyrpang bad kane ka pyni ba ki samla na Ri Bhoi ruh kim de kiba dang duna bad ki dei ki samla kiba la kiew shaphrang ha ki sap ki phong.

Shuh shuh, nalor ka jingpynshlur ia ki samla kiba la wan ban shim bynta ha kane ka District Level, u Bah Mayral Born Syiem u la ai ruh ka jingkular ban ai da ka khusnam pisa sha ki nongjop ha baroh ki jingiakop la ki dei ki synrang bad kynthei ruh bad kane ka jingai khusnam ka long kum ka jingpynshlur ia ki samla ka District ba kin dang lah shuh shuh ban pynjanai ia ki sap kyrpang ba la ai da u Blei.