Nongpoh, Naiwieng 14: Ka Ri Bhoi Youth Federation (RBYF) Sengkmie, ka la pynkup burom ia 28 ngut ki samla pule na Ri Bhoi bad kiba la pass bha ha ka Secondary School Leaving Certificate (SSLC), katba ha ka Higher Secondary School Leaving Certificate, ki la sam khusnam sha kito kiba la wan shakhmat ha ka Science, Commerce bad ha ka Arts.

Ia katei ka prokram ban pynkup burom bad sam khusnam sha kitei ki samla pule kiba la wan shakhmat ha ka SSLC bad HSSLC, la sakhi da ka jingdon u Bah Sosthenes Sohtun, Myntri ka sorkar jylla, nangta u Bah Bipul Thangkhiew, President rangbah ka RBYF, u Bah Skhemboklang Marbah, Education Secretary ka RBYF Sengkmie, u Bah Liander Nongshli, Working President, u Bah Agustine Sten, Adviser, u Bah Balawan Marwein, Finance Secretary, kiwei nongialam ka RBYF, ki riew rangbah bad ki nonghikai.

Haba iadei bad katei ka jingpynkup burom ka RBYF, ki nongai jingkren ha katei ka sngi, ki la iaroh eh ia ka RBYF namar ba ka la shimkhia ha ka ban pynkup burom ia ki samla kiba la wan shakhmat ha ka SSLC bad HSSLC bad kiba la ong ba katei ka jingkynmaw jong ki ban pynkup burom, ka long kum shibynta ha ka ban kyntiew ia ka pule puthi ym tang ha Distrik, hynrei ha ka jylla hi baroh kawei.

Nalorkata, ki la kyntu ruh ia kitei ki 28 ngut ki samla pule, ba ki dei ban dangiai trei shitom shuh shuh, khnang ba kin ioh ban kheit ia u soh ka jingjop bad ha kajuh ruh ka por, ki la kyntu ia kitei ki khynnah skul, ba ki dei ban nang ha ka ban burom ia ki nonghikai bad ia kiba halor khnang ba kin long briew man briew na ka bynta ban kit lem ia ka lyngkor ban trei na ka bynta ka District bad ka jylla hi baroh kawei.