Nongpoh, Naiweing 13: Ka long shisha ka jingkmen kaba khraw bad ka jingmuja ia ki Khynnah Shnong ka Shnong Mawlyndep ha Ri Bhoi District, ha kaba ka National Service Scheme (NSS) Unit  ka Union Christian College mynta ka sngi ka la pynlong ia ka prokram kyrpang bad shi bynta ruh ka jingrakhe ia ka sngi kyrpang jong ki khynnah ha katei ka shnong.

Ha kane ka prokram la wan shim bynta da u Rangbah Shnong ka Shnong Mawlyndep kum u kongsan bad la sakhi lang ruh da ka jingdon lang ki riew rangbah ba kynthup ia u Bah Banshah Syiem Kharkongor, u Bah Jarnel Syiem, ka Kong Balongiing Pde kaba de ka Programme Officer ka NSS Unit, kynthup ruh ki samla pule, ki kmie ki kpa bad ki nongshong shnong kiba la ialehkmen lang bad ki khynnah.

Kane ka jingpynlong ka NSS Unit ka Union Christian College ia kane ka prorkam (Camping camp) ka dei ruh shi bynta ba ki samla pule na katei ka College kin ioh lad ban ia kynduh ia ki nongshong shnong bad ruh ban rakhe kyrpang ia ka sngi kyrpang jong ki khynnah  ba la shim bynta shirthrem da ki khynnah jong katei ka Shnong.

Ha kane ka prorkam, ki khynnah ki la ioh lad ban shim bynta ha ki jingialehkai bapher bapher bad kynthup ruh naduh ka shad ka kmen, ka tem ka pur bad kiwei kiwei ki jingialehkai, kiba la pynkmen shisha ia ki khynnah katei ka shnong.