Nongpoh, Naiwieng 14: Ka tnad Soil and Water Conservation ka sorkar jylla mynta ka sngi ka la lah ban pynkup burom haduh 21 ngut ki Field Assistant kiba la pyndep ia ka prokram ai jinghikai kaba 11 bnai bad kaba dei ruh ki 51st Batch Field Assistant Trainees 2024-25 ba la pynlong ha Auditorium Hall ka CTI Byrnihat.
Ha kane ka sngi u Director ka tnad Soil and Water Conservation u Bah L . Shabong u la wan ban shim bynta kum u kongsan ban pynkup burom ia kitei ki 21 ngut ki Field Assistant bad la sakhi lang ruh da ka jingdon lang kiwei kiwei ki ophisar na ka tnad soil and Water Conservation bad ruh na CTI Byrnihat ha ryngkat ka jingwan ai mynseim kiba haïing hasem kitei ki Field Assistant.
Lyngba jong kane ka sngi, la sam ruh ia ki synod bad ki khusnam sha kitei ki 21 ngut ki Field Assistant kiba la wan shakhmat ha kane ka prokram ai jinghikai bad ha ki examination bad kynthup ruhh kiwei kiwei kiba ki la long kita ki nongjop.
Haba kren ha kane ka sngi kum u kongsan, u Bah L. Shabong kum u Director u la pynpaw ia ka mynsiem jong ka jingkmen bad ka jingiaroh ia kitei ki 21 ngut ki Field Assistant kiba la pyndep hok ia ka jingshah ai jinghikai kynthup naduh ki kynthei bad ki shynrang bad u khmih lynti ruh hadien ba ki la pyndep ia kane ka prokram ai jinghikai kaba 11 bnai kin sa leit ban shakri sha ki jaka ba la buh da ka sorkar da ka jingkhmih lynti ba kin ai ka jingshakri kaba bha tam ia ki paidbah.