Shillong, Naiwieng 14: Ki nongialam ka KSU Umsning Circle mynta ka sngi ki la leit syndon ban ia kynduh ia u Myntri sorkar ba dei peit ia ka tnad ka koit ka khiah bad kumjuh ruh ia ka Tnad Sports ha ka jylla, na ka bynta ban pynsngew ia ki ar tylli ki mat ki jura kiba donkam u paidbah ha ka thaiñ Umsning ha Ri Bhoi District.

Ha kane ka jingleit kynduh ia utei u Myntri sorkar u Bah Wailadmiki Shylla la ialam da u President u Samla Lester Nongbet bad u General Secretary u Samla Laiaraplang Nongbri lem bad ki dkhot. Ha kane ka jingiakynduh nalor ba ki la pynsgew ia kitei ki ar tylli ki mat ba donkam u paidbah ha Umsning, ka seng ka la aiti ruh da ka dorkhas sha u Myntri sorkar ba un shim khia lem halor kitei ki jingdonkam ki paidbah ha ka thain Umsning.

Kine ki ar tylli ki mat ba la buh da ka KSU Umsning Circle hakhamt u Myntri sorkar ba peit ia ka koit ka khiah bad ia ka tnad Sport ki kynthup ban pynbiang Doctor ha CHC Umsning, kaba dei kawei na ka jaka ai jingsumar ba mat jingeh ki paidbah da ka jingbym biang ki Doctor bad kawei pat ka mat ban dawa ban pynioh ia ka madan ialehkai kaba paka ha thain Umsning na ka bynta ban kyntiew ia ki khun samla kiba don sap ha ka kam ialehkai phutbol bad kiwei kiwei ki kam ialehkai sport ba ka seng ka la ju pynlong ia ki tournament na ka por sha ka por ban kyntiew ia ka kam ialehkai sport.

Haba kren sha ki lad pathai khubor, U president ka KSU Umsning Circle u Samla Lester Nongbet u la ong ba kane ka jingkynduh ka seng ia u myntri sorkar ka dei ka jingangnud ka seng ban peit lem ia ki jingdonkam ki paidbah kata ka long ban pynbiang doctor ha Umsning CHC bad kawei pat ka long ba ka sorkar kan wan rah ruh da ka madan kaba paka ha Umsning na ka bynta ban kyntiew ia ki kam ialehkai sport bapher bapher.

U la ong ruh ba na Usmning ki mih ki nongialehkai sport kiba la wan rah nam wan rah burom ia ka District bad ka jylla, hynrei  kumba long haduh mynta ka Umsning kam don ia ka mada kaba paka bad de namar kane ka daw ka seng ka shim khia ia kane ka mat ban kyrpad ia ka sorkar jylla ym tang ha kaba pynbiang doctor ha Umsning CHC ba mad jingeh ki paidhah ha ka pang ka shitom bad ban wan rah noh da ka madan ialehkai kaba paka khnang ba ka thain Umsning kan dang lah ban pynmih ia kiba bun ki samla don sap ha ka kam ialehkai sport.

Shuh shuh, u la bynrap ruh da kaba ong, ba ka seng ka sngewkmen pat ba u Myntri sorkar ba peit ia ka koit ka khiah bad ruh ia ka tnad sport ha kane ka jingiakynduh, u la kular ban shim khia ym tang ban pynbiang doctor ha CHC Umsning ban suk kiba pang ba shitom, hynrei u la kular ruh ban thaw lad na ka bynta ban pynioh ia kata ka madan kaba paka ha Umsning ban ioh lad shisha ki samla ban kiew  ha ki kam ialehkai sport bapher bapher, u la bynrap.