Shillong, Nohprah 09: Ka Mawsaw CRD Block Demand Committee hynne ka sngi kala kynduh ia u Myntri Rangbah ka Jylla u Conrad K Sangma ban buddien iaka jingdawa pynkha Mawsaw CRD Block.

Ka Mawsaw kaba hap ha Shilliang Um naka Mawkyrwat katkum ka Sorjamin (Survey) 2011, ka don 10 tylli ki Gram Sevak, 118 tylli ki shnong bad papat 35,604 ngut ki nong shong shnong.

Ka Mawsaw ka jngai palat 28 km na Mawkyrwat bad ka don 24 tylli ki Secondary Schools, 70 tylli ki Upper Primary Schools bad 180 tylli ki Lower Primary Schools.

Ka thain ka don ruh 2 tylli ki PHC kata ka Mawthawpdah PHC bad Wahkaji PHC nalor 10 tylli ki Sub-Centres, 1 Meghalaya Rural Bank Mawthawpdah Branch, ka Ophis PWD (Road) Sub-Division, MEECL Sub-Station bad 2 tylli ki Veterinary Dispensaries bad 4 tylli ki iew kata ka Mawthawpdah, Rangblang, Mawkhan bad Umdohiun.

Haba iadei bad kane u MLA ka Mawkyrwat constituency u Bah Renikton Lyngdoh Tongkhar u la ong ba ka jingdawa Mawsaw CRD Block kadei kaba la slem bad ia kane ka juh ka mat, u la kren teng hapoh ka Iingdorbar thawain.

U Bah Renikton u la iathuh ba ka Sorkar Jylla haka por ba u Bah Hamletson Dohling u bat kum u Myntri ka tnat CRD, kala pynsngew baka jingdawa Mawsaw CRD Block ka long kaba don nongrim.

“Ka jingdawa Mawsaw CRD Block kadei ka jingdawa u paidbah namar ha Mawkyrwat ki don artylli ki Block kata ka Ranikor CRD Block bad Mawkyrwat CRD Block bad ka jingpynkha thymmai sa kawei ka Block kan wanrah shuh shuh ka jingiajan hapdeng ka synshar bad ki paidbah nong shong shnong” la ong u Bah Renikton.