Nongpoh, Nohprah 10: Haba don ki riew kylluid mynsiem bad kiba don kata ka mynsiem ieit para briew ka da long shisha ka jingkyrkhu kaba khraw ia kawei ka longïing baduk ba kyrduh ha ka shnong Tyrso, hakaba mynta ka sngi da ka jingkyrshan borbah u Bah Charles Marngar kum u MLA bad ryngkat ka kur ki la lah ban plie bad aiti noh ia ka ïing kaba la dep ban shna sha katei ka longïing.

Ha kane ka sngi ym tang ba la aiti ia katei ka ïing ba la dep ban shna itynnad da ka kur bad da ka jingkyrshan u MLA, hynrei la rakhe kyrpang ruh ia ka sngi kha ka jingdap 41 snem u Bah Charles Marngar, uba dei u MLA ka Mawhati ryngkat katei ka longïing bad na kiba haïing hasem jong katei ka longïing.

Kane ka longïing kaba la ioh pdiang ia katei ka ïing ba thymmai ba la kyrshan da u Bah Charles Margnar kum u MLA ryngkat ka Kur Sten kaba long ruh kum ka jingai sngewbha Christmas bad ruh ka jingai sngewbha ha ka lyngkhuh sngi kha u Bah Charles Marngar kum u MLA ka dei ka longïing jong ka mei-ieit Tris Sten kaba la don 62 snem ka rta na ka shnong Tyrso bad kaba don ruh 2 ngut ki khun bad 6 ngut ki ksiew.

Kane ka longïing ka dei ruh ka longïing kaba ban shisha ka jingduk jingkyrduh ha kaba la ioh ruh ban shna ïing da ka  nongrim ïing ba la ai sngewbha da kawei ka longïing na ka kur Sten bad lyngba ka jingkyrshan borbah u MLA bad ka kur Sten la lah ban plie paidbah bad ruh la aiti mynta ka sngi sha katei ka longïing da u Bah Charles Marngar kum u MLA ka thaiñ.

Haba ai jingkren napdeng uwei na ki Kñi ka Kur Sten, u Bah Banker Sten u la pynpaw ba kane ka longïing ka dei shisha ka longïing kaba mat ia ka jingjynjar na ka jingban jong ka jingduk ka jingkyrduh bad sngew pangnud ruh ba kim don kata ka jaka sah kaba biang kaba la pynlong ia ka kur Sten kiba don ha ka thain Mawlasnai bad Tyrso ban ia synñiang ban pynshna ia kane ka ïing kaba thymmai ryngkat ka jingkyrshan jong u Bah Charles Margnar kum u MLA.

U la iathuh ruh kiba bun ki para kur Sten ki dei hi ruh kiba duk ba kyrduh ban pynmih ia u synñiang ban pynshna ia kane ka ïing, hynrei dei lyngba ka jingkylluid mynsiem bad ka jingkyrkhu u Bah Charles Marngar kum u MLA ka kur Sten kan sa lah ban pynurlong ia kane ka jingthmu ban pynshna ia kane kane ka ïing na ka bynta kane ka longïing jong ka kur Sten.

Haba ai jingkren ha kane ka sngi, u Bah Charles Marngar kum u MLA u la iathuh ba kane kadei ka sien kaba hynriew ba ha ka jinglong MLA jong u, u la lah ban pynshna ïing sha ki longïing baduk bad ki dang don ruh ki longïing kiba u dang pynshna ïing ban sa plie ne aiti ha u snem ba thymmai.

Kumjuh ruh na ka liang ka khun kaba heh jong u Bah Charles, haba ai jingkren ka la ong ba u kpa jong ka ruh u dei u ba wan na ka Longïing longsem kaba duk, kumta ka pynlong ia u ba un noh Synñiang bad iarap sha ki Longiing kiba duk ba jynjar.

Shuh shuh, ha kane ka sngi hadien ba la dep ban plie bad aiti ia katei ka ïing sha katei ka longïing, la ia snoh kti lang ruh ban lehkmen ia ka sngi kha  u Bah Bah Charles Marngar, kaba u la kynjoh sha kata kaba 41 snem ha ka jingiaid lynti jong ka jingim bad ryngkat ki jingkular ba un dang bteng ban ai ka jignshakri kaba bha tam ia ki paidbah bad ban phai khmat kyrpang ruh sha kiba duk ba kyrduh ha ka imlang ka sahlang.