Nongpoh, Rymphang 10:  Ka Dorbar Shnong Bhoirymbong Lumsohpieng ryngkat ka jingiatre lang bad ka VDP mynta ka step ki la ioh ban kurup da ki phew litar ka kyiad pyrsi ba la buhrieh da ki 3 ngut ki rangbah ha ka khlaw kaba dei ha ki bynta jong ka surok ban leit sha ka Shnong Mynsain ha ka thaiñ Bhoirymbong ha Ri Bhoi.

Kumba la ioh lum jingtip, kane ka jingioh bat ia kitei ki 3 ngut ki rangbah bad ioh kurup ia katei ka kyaid pyrsi, ka dei da ka jingbuddien ka Shnong bad ki VDP naduh hynnin ka meit bad ha ka jingleit khynra mynta ka step ki la ioh ban bat ia ki 3 ngut ki rangbah bad ryngkat ka jingioh kurup ia katei ka kyiad ba la buhrieh ha ki bynta jong ka khlaw.

Ka shnong bad ki VDP tang mar ia ioh bat ia kitei ki 3 ngut bad la ioh ban kurup ia ka kyaid pyrsi, hadien ba la ki la tohkit bha, ki la leit ban aiti noh ia ki ryngkat ka kyaid sha ki Pulit ka Khapmara PIC ban leh ia kaba donkam katkum ki kyndon jong ka ain.

Kane ka jingleit khynra ruh ka dei ha ka jingialam u Rangbah Shnong ka Bhoirymbong Lumsohpieng u Bah Hamjngai Hinge bad na ka liang u Rangbah Shnong u la pynrem jur ia kum kine ki kam beaiñ bad ha kajuh ka por u la khot la wer ruh ia kiwei ki shnong ba marjan ban don ka jingiatrei lang na ka bynta ban pynduhjaid ia kikam die kyiad beain bad ruh kiwei kiwei ki kam sniew kiba ktah ia ka shongsuk shongsain bad ia ka bha ka miat jong ki paidbah nongshong shnong.