Nongpoh, Nailur 7: Ki pulit jong ka Ri Bhoi hynnin ka janmiet ki la ioh ban kem ia ar ngut ki briew kiba la suba donkti ban shalan beain ia u ganja, katba ki dang wanphai na nongbah Shillong sha Nongpoh lyngba kawei ka kali kamai Tata Sumo kaba don ia u registration number ML10D5684.
Ka jingioh kem ki pulit ia kitei ki ar ngut, kadei lyngba ka jingai jingtip jongka KSU NKHD sha ki pulit ka Ri Bhoi kiba la pynlong pat iaka jingpynapshrip haka surokbah National Highway 6, Lad Umtrew jongka thain Umsning.
Kitei ki ar ngut ki ba la suba bad shah kem noh, kidei kiba tip kyrteng kum u Bobystar Kharbani, 23 snem ka rta naka shnong Pahamsyiem bad u paralok uba leit bud lang ia u, ia uba la tip kyrteng kum u Patrick Lyngdoh, 33 snem naka shnong Mawroh.
Haka jingtalasi ki bor pulit ia ka pla jong utei u Bobystar Kharbani, la ioh ban kurup haduh 66 tylli ki song ganja kiba don iaka jingkhia kaba 3.984 kilo kiba la thmu ban pyniaid iew ha ki thain Nongpoh. Halor kane ka jingjia, ki bor pulit ki la kem noh ia utei u Bobystar Kharbani lem bad u paralok u jongu hapoh ki kyndon jongka Narcotic Drug and Psychotropic Substances (NDPS) Act, 1985 bad ka jingtohkit halor kane ka kam ka dang iaid shaphrang.
