Nongpoh, Naiwieng 11: U Myntri Khynnah ka sorkar pdeng ba dei peit ia ka tnad Consumer Affairs, Food and Public Distribution u B.L Verma myntaka sngi u la iuhkjat ha Ri Bhoi District kum kata ka Aspirational District na ka bynta ban peit ban khmih ne wad jingtip halor ki jingpyntreikam ia ki kam pynroi bapher bapher ka sorkar pdeng ba la pyntreikam ha kane ka District kaba la shah jied ha ka thup jong ki Aspirational District.

Ha kane ka jingwan iuhkjat bad ka jingjurip une u Myntri khynnah ka sorkar pdeng la synran lang da Additional Deputy Commissioner ka Ri Bhoi u Bah Jonathan Shylla, u Block Development Officer ka Umling C&RD Block u Bah Erik K Dkhar,  ka Assistant Commissioner ka E. Pradhan  bad kiwei kiwei ki ophisar na ka District.

Na ka liang une u Myntri ka sorkar pdeng u la sdang shuwa ia ka jingjurip ia ia ki kam pynroi da kaba sdang na One Stop Cetnre ha Nongpoh bad leit jurip ia ka Mawtnum Fair Price Shop, ka Umdihar Food Processing Unit bad ruh ha Umroi Health and Wellness Centre, ha kaba ha man ki jaka ba u jurip u la kylli pyrthew ia ki rukom pyntreikam ia ki kam pynroi kiba ioh ha kane ka District kumta ka Aspriational District.

Ka jingthmu kane ka jingjurip ia ki jingpyntreikam ia ki kam pynroi, ka dei ruh shi bynta ban pyntrei hok ia ki kam pynroi, ban nym pyndonkam bakla bad ki jingpyntreikam ki de ban iaid beit iaid ryntih na ka bynta ban kyntiew ia ka roi ka par bad ka  ioh ka kot jong ki paidbah ha kane ka District.

Shuh shuh, na ka liang une u Myntri khynnah ka sorkar pdeng, un pynlong ruh ia ka Press Conference bad ki nongthoh khubor ba la pynbeit ban pynlong ha ka 12 tarik u Naiwieng 2025, da ka jingthmu ba un batai ka jingthmu jong kane ka jingwan iuh kjat ha Ri Bhoi bad ban tohkit halor ki jingpyntreikam ia ki kam pynroi bapher bapher katkum ka thong jong ka Aspirational District.