Nongpoh, Nailur 07: Ban pynkupbor ia ki Longkmie ba kin don ruh kata ka jingkitkhlieh ban shakri na ka bynta ka bha ka miat bad ka jingmyntoi ki paidbah ha baroh ki liang lyngba ka NPP party, ka President ka State National People Women’s Front (NPWF) jong ka National People Party (NPP), ka Kong Grace Mary Kharpuri mynta ka sngi ka la wan ban pynskhem ia ki nongialam ka National People Women’s Front, Ri Bhoi District, ha ka jingialang kaba la long ha Dorbar Hall, Sajer Nongpoh.
Ha kane ka jingpynskhem ia ki nongialam ka NPWF Ri Bhoi District la don ryngkat u MLA ka Jirang u Bah Sosthenes Sohtun, u President ka NPP Ri Bhoi, u Bah Clement Mawlong, u Bah Samlin Malngiang Secretary incharge ka ka Ri Bhoi, Ka Kong N. Nongpluh, Vice President ka National NPWF, ka Kong Rona Khymdeit, MDC ka Nongpoh, u Bah Donbok Khymdeit, u Bah Rayonald Kharkamni, working President ka NPP Nongpoh Block, bad kynthup kiwei kiwei ki nongialam ba hakhamt ka NPP na Ri Bhoi bad na ka jylla.
Kitei ki nongialam ka NPWF Ri Bhoi District ki kynthup ia ka President ba la jied ia ka Kong Wanmontimai Marbaniang, Aitidora Wahlang Working President, Santi Jyrwa Vice President, Mardilet Kharnaior Vice President Rosilia Makri General Secretary Veronica Santi Warjri Spokesperson, Macdalyne S. Mawlong Adviser lem bad kiwei kiwei ki dkhot bad ki nongialam.
Ki nongkren ha kane ka sngi naduh u Bah Sosthenes Sohtun kum u MLA, ka Kong Grace Mary Kharpuri kum ka President ka State NPWF, u Bah Samlin Malngiang bad ka Kong Rona Khymdeit, ki la pynpaw ba ka jingthmu jong kane ka jingpynshem ia ki longkmie kum kita ki nongialam hapoh ka party lyngba ka NPWF, ka long ban dang pynkhlain ia ka party na ka bynta ka election 2028 bad ruh lyngba kine ki Longkmie kin pynkhlain ruh ia ka jingshakri ban wan rah ia ka roi ka par bad ka bha ka miat jong ki paidbah ha ki District bad ha ka jylla hi baroh kawei.
Shuh shuh, ki khkih lyntri ruh ba lyngba ka jingiatylli ki Longkmie hapoh ka jylla hi baroh kawei, kane kan pynkhlain shisha ia ka party ba kan dang wan ha ka bor bad ruh ba kan dang ioh ban synshar ha ka jylla hadien ka election 2028 na ka bynta ban shakri kypang ia ki paidbah jong ka jylla ha baroh ki liang.
