Shillong, Nailur 04: Hadien 17 snem jong ka jingiakhun mokotduma, ka Meghalaya High Court kala pynkut noh iaka mokutduma pyrshah iaka MLA ka Laitumkhrah Constituency ka Dr. Ampareen Lyngdoh kaba dei ruh ka Myntri ka Sorkar Jylla.
Lah ban kdew baka Myntri Sorkar ka Dr. Ampareen Lyngdoh kala shah kynnoh donkti haka ban lehtuh lane pyndonkam sia lieh haka ba iadei bad ka jingthungkam nonghikai ha u snem 2008.
Kane ka jingjop ka Dr. Ampareen ba ka Ingbishar ka la ai rai jop iaka, ka la long shisha ka khubor jong ka jingkmen ia ka kum ka nongmihkhmat bad myntri sorkar bad kumjuh ruh ia ka ing ka sem bad baroh ki nongkyrshan jongka kum kata ka Nongmihkhmat kaba ju ai ka jingshakri ia ki paidbah ha ka constituency bad ha ka jylla hi baroh kawei.
Haba kren shaki lad pathai khubor ka Dr. Ampareen Lyngdoh kala ong ba haki 17 snem, ma ka bad ka iing ka sem jong ka kala shah kynthoh lai phew jait lai phew rukom, namar ka jingshah kynnoh donkti haka ka ban lehtuh ban thungkam nonghikai.
Ka Dr. Ampareen kala ong naduh ba shah kynnoh ba don bynta ban lehtuh haka kam thung nonghikai, kam ju pyni nia ne kam ju mih ban pynksan ialade halor kane ka mat namar ka shaniah haka ain bad haka Iingbishar.
“Ka Meghalaya High Court mynta ka sngi kala pynbna ba kam don satia kano kano ka jingleh thok ne ka jingpyndonkam sia lieh (White Ink) haba iadei bad ka jingthungkam nonghikai ha u snem 2008” la ong ka Dr. Ampareen.
Haba pynpaw ka jingsngewkmen bad ka jingshaniah iaka Iingbishar ka Dr. Ampareen kala ong “Ka rai jong ka Meghalaya High Court mynta ka sngi kala pynskhem iaka nongrim kaba nga ieng bad nga ai khublei ia baroh kiba la don lang bad nga ha kine ki 17 snem”.
Ka Dr. Ampareen, kala ong ba haduh mynta kam pat ju pyndonkam bakla iaka bor baka don, kum ka Myntri Sorkar ne kum ka nongmihkhmat jong ka constituency.
