Shillong, Rymphang 25: Ban kyntiew bad ban pynkhlain ia ki samla ka jylla ym tang ba ki don ia kita ki sap ki phong ha ka rwai ka siaw, ka put ka tem kiba long tang ha ki kynja ba pynsgnewbha pythei, u Bah Charles Marngar MLA ka Mawhati ha ka dorbar mang tyngka mynta ka sngi u la kyntu ruh ia u Myntri rangbah ka jylla u Conrad K. Sangma ban mang pisa kyrpang ruh na ka bynta ban pynlong man la u snem da ka ‘Gospel Concert’ khnang ba lyngba ki Gospel concert kan pynkhlain ruh ia ki khun samla ha ka jingim ba kynja mynsiem.
U la pynpaw ruh ba ka jylla Meghalaya ka dei kata ka jylla kaba la paw bha ha ka put ka tem bad ka rwai ka siaw bad ruh ia ka Shillong la tip kum ka Rock Capital of India, hynrei ha kawei ka bynta u la pynsngew pat la donkam ruh ban don kita ki Gospel Concert ba man la u snamm ba ka sorkar ka hap ban mang pisa kyrpag khnang ba kane kan iarap ia ki khun samla ym tang ba kin sei ia ki sap ha ka put ka tem ne ka rwai ka siang bad kane kan pynbha ruh ia ka jinglong jingman bad ka jingim ba bha ki khun samla hapoh ka jylla.
Nalor ka jingkyrpad ia u Myntri rangbah ba buh ia ka mang tyngka ban pynlong ia ka Gospel Concert kaba man la u snem ha ka jylla, u Bah Charles Marngar ula kren ruh ban buh mang tyngka kyrpang ruh na ka bynta kiwei kiwei kiba kynthup ia ka jingdonkam ban pynneh pynsah ia la ki riti ki dustur lyngba ka Arts and Culture, ban kyntiew ia ka rep sohtrun, ka jingrep syieng ha Ri Bhoi bad u la kren ruh ia ka Kong Margret Pathaw kum ka lahduh ha ka jingiakhun kti ka pyrthei ba ka la long ha Turkey bad ba ka la ioh khur ia ka takma ksiar kaba long ka burom ia ka jylla bad ruh ka sorkar ka hap ban thaw lad kyrpang ruh na ka bynta ki samla don sap ha ki kam ialehkai sports.
Ka la long ruh ka jingkmen ia kine ki mat ba la wan rah da u Bah Charles Marngar, namar haba ai jingmut halor kitei ki phang u Myntri rangbah ka jylla u Conrad K. Sangma u la kular ban thaw ki lad ki lynti bad khamtam na ka bynta katei ka Gospel Concert ban pynlong man la u snem na ka bynta ban kyntiew ia ki khun samla ba kin lah ban im ha ka jingim kaba bha ha ka jylla.
