Nongpoh, K’lyngkot 08: Khlem da don shuh ka mynsiem jong ka jingiatip lem, ki runar kiba ym lah ban tip satia ki la khlong tuh haduh 27 tylli ki Pipe um kiba dei na ka skhim JJM ba la dep ban shna bad pynpoi um bam um dih sha ki ar tylli ki shnong ha ka thain Killing ha ka Shnong Jorbil bad ka shnong Umlangpur.

Kane ka jingkhlong tuh ki runar ia kitei ki pipe um ka la wan rah shisha ka jingduhnong kaba khraw ia ki paidbah nongshong shnong kitei ki ar tylli ki shnong, namar naduh ba la rong tuh bad pynjot ki runar ia kitei ki pipe um ki paidbah ki la hap ban mad ia ka jingkyrduh ha ka liang ka umbam ka umdih.

Kane ka skhim JJM ba pynpoi um sha kitei ki 2 tylli ki shnong ka la kot haduh T. 3 klur ba ka sorkar ka la wan rah ia katei ka skhim ban pynpoi umbam umdih sha kitei ki ar shnong.

Kumba la ioh lum jingtip, kane ka jingshah rong tuh bad shah khlong ki pipe um ka skhim JJM ka la paw pyrthei, hadien ba ki paidbah nongshong shnong ki la ud la nam sha ki bor shnong halor ka jingbym poi shuh ka umbam ka umdih sha ki shnong, ha kaba ka bor shnong ka la leit ban jurip bad la lap pynban ba ki runar ki la dep ban khlong ia ki pipe um bad rong tuh haduh 27 tylli ki pipe kaba la wan rah ka jingkyrduh umbam umdih ha kitei ki ar shnong.

Shuh shuh, halor kane ka jingshah tuh ki pipe um ka skhim JJM, ka bor shnong ka la pyntip sha ki Pulit bad ki la leit ban jurip lang ha kitei ki jaka ba shah tuh ki pipe um bad hadien kata ka bor shnong ka la ujor da ka ejehar ha Khanapara Police Station na ka bynta ban twet ia kitei ki runar kiba la don kti ban tuh ia kitei ki Pipe Um jong ka skhim JJM.