Nongpoh, K’lyngkot 08: Ban wan rah ia ka jingiatylli bad ka jingiaieit hapoh ka shnong ka thaw bad shi bynta ruh ban lehkmen ia u snem thymmai, ka Shnong Mawkhla Mawsyntai kumba ka ju leh shisien shi snem kumba la ialam da ki longshuwa ki manshuwa mynta ka sngi ka la pynlong da ka jingiabam khana shnong kaba dei kawei na ka thong ban wan rah ia ka jingiatylli hapdeng ki paidbah nongshong shnong kane ka shnong.

Ia kane ka jingbam khana shnong la ialam da u Rangbah Shnong u Bah Singrum Shylla bad ryngkat ka jingiatrei lang naduh ki Seng Longkmie, ki Seng Samla bad la wan ruh ban shim bynta da u Bah Finingstar Lyngdoh uba dei u nongshong shnong ka Shnong Mawsyntai kum u kongsan, ha kaba u la  noh synniang ruh da ka song pisa sha ka shnong Mawkhla Mawsyntai.

Haba ai jingkren ha kane ka sngi, u President ka Seng Samla Mawkhla u Samla Munlibha Kleiñ, u la pynpaw baa ka jingthmu ba kongsan ban pynlong kum kane ka jingiakynduh lang lyngba ka bam khana shnong, ka dei ban ialam ne ai jinghikai ia ki khun samla haka lynti kaba beit ban ioh iaka jinglong kawei bad ba kin nym bakla ia ka lynti iaid ba kin nym ngop haki jingmyllien kiba sniew kum haki jingdih buaid bad kiwei kiwei ki kam sniew.

Ka kong Elbina Binong kum kawei na ki dkhot ka seng longkmie kala ka la kren halor ka jingiaid lynti jong ka shnong naduh ba la suid la shor ia ka shnong kam don kano kano ka jingiabishni pihuin bad kane ka shnong ka la kiew sted ha ka ioh ka kot bad ka bha ka miat jong ki paidbah nongshong shnong kaba dei lyngba ka jingkyrkhu jong u Blei Nongbuh Nongthaw.

Na ka liang u Bah Finingstar Lyngdoh haba kren ha kane ka sngi kum u kongsan, u la ai jingiaroh naduh ka bor shnong, ki seng longkmie bad ki samla ba dei lyngba ka jingdon ka jingiatylli ki la lah ban pynlong ia kane ka jingiabam khana shnong kaba long kum ka dak jong ka jingieit bad ka jingiatylli hapdeng ki para nongshong shnong.

U la kyntu ruh ba ki dei ban dang bteng ia ka jingiaieit bad ka jingiatylli na kabynta ban kyntiew ia ka shnong ka thaw, namar dei tang lada don kata ka jingiasngewthuh jingmut bad ka jingiatylli ka shnong kan dang lah ban kiew ha baroh ki liang ha ka long briew ka man briew.

Lyngba jong kane ka sngi, nalor ka jingbam khana shnong ki paidbah nongshong shnong, la pynlong ruh ia ki jingialehkai bapher bapher ba la shim bynta naduh ki samla, ki longkmie bad ki heprit ban pynkmen ha kane ka sngi ba ki pynlong iaka jingbam khana shnong.