Shillong, Nailar 07: Ka Synjuk Ki Khlieh Nongsynshar Shnong Mawsynram C&RD Block hynne ka sngi kila dawa naka Sorkar ban kyntiew kyrdan noh iaka Mawsynram C&RD Block sha ka Mawsynram Civil Sub Division.
Ia kane ka jingdawa ka Synjuk Ki Khlieh Nongsynshar Shnong Mawsynram C&RD Block kala pynsngew haka jingiakynduh ia u Myntri Rangbah ka Jylla u Conrad K Sangma.
Haba kren shaki lad pathai khubor u Chairman ka Synjuk jong ki khlieh nongsynshar shnong jong ka Mawsynram C&RD Block u Bah Hiamdor Rapsang u la ong ba ka jingdawa kyntiew kyrdan Mawsynram Civil Sub Division ka dei kaba la slem bha ka ba la jan dap 25 snem
U Bah Hiamdor ula ong baka jingkyntiew kyrdan sha ka Civil Sub Division kan ai jingmyntoi iaki nongshong shnong jong ka thain Mawsynram namar kan wanrah shibun iaki kam pynroi.
Ula ong baka Mawsynram ka jngai kumba 60 km tam na Shillong bad ki don ki shnong kiba don haki thain khappud kaba buh jingeh iaki ban wankiew sha Shillong naka bynta ki jingdonkam.
“Ka sor Shillong ka la khapngiah lypa kumta ka jinngkyntiew kyrdan sha ka Civil Sub Division kan long ka jingmyntoi namar ki paidbah ka thain kim donkam shuh ban wan sha Shillong la kadei naka bynta ban ioh sumar, ban pule bad kiwei kiwei ki jingdonkam” la ong u Bah Hiamdor.
Haba kylli u Chairman ula iathuh baka jingiakynduh ia u Myntri Ranghbah ka long kaba sngewtynnad ha kaba ki la ioh ia ka jubab kaba shai na u bad u la kular ban sa shimkhia halor kane ka kam.
