Nongpoh, Nailar 19: Ban tem ia ki jingiakynad hapdeng ki nongshong shnong ka Maikhuli bad na ki Shnong khappud ka Assam ba la mih ka jingiapynibor na ka jingwan thung ka Assam State Electricity Board ia ki Post Ilektrik sha ka Shnong Maikhuli ba hap ha Meghalaya, ki bor synshar District ka Ri Bhoi bad ka Kamrup District ki la thung syndon da ka Peace Committee na ka bynta ban tem ia kitei ki jingiakynad khnang ban wan ka shongsuk shongsain ha kitei ki shnong khappud.
Kum ban pynkynmaw, kane ka jingiakynad ka la mih ha kitei ki shnong khappud ka Meghalaya bad Assam, ka dei hadien ba ka Assam State Electricity Board, ka la wan thung ia ki 2 tylli ki post ilektrik sha ka shnong Maikhuli, ha kaba ki paidbah nongshong shnong bad ka shnong ki la pyrshah ba katei ka jaka ba wan thung ia ki post ilektrik ki la hap ha ka shnong Maikhuli ha ka jylla Meghalaya.
La sakhi ruh ba ha kine ki sngi la mih ka jingiapynbor hapdeng ki nongshong shnong ka Maikhukhuli bad na Assam haduh ba la hap ban poi ki bor magistrate bad ki Pulit ban tem ia katei ka jingiakynad bad dang hynnin ka sngi ka jingiapyni bor ka la kham jur ka dei hadien ba ki nongshong shnong ka Maikhuli ki la weng noh ia kitei ki Post Ilektrik ba la mih ka huri hura haduh ba la ia pynibor hapdeng ki briew na Assam bad na ka Shnong Maikhuli.
Haba ia kren bad u Deputy Commissioner ka Ri Bhoi mynta ka sngi halor katei ka jingjia, u Abhilash Baranwal u la iathuh ba ka bor synshar District na Ri Bhoi bad na Kamrup ki la shim khia ban tem ia katei ka jingjia bad ruh ban pynsngewthuh sha ki paidbah ba kim dei ban wan rah kano kano ka kynrum ka kynram kaba ktah ia ka shongsuk shongsain ki paidbah.
U la ong ruh kumba la mih ka jingiapynibor ha kine ki sngi kaba la ktah ia ka shongsuk ka shongsain, na ka liang ki bor synshar District ki la ia kren pynbeit ban tem ia kane ka jingjia bad ruh la thung syndon da ka Peace Committee ha kaba la long dkhot lang 8 ngut na Assam bad 8 ngut na Maikhuli ban tem halor kane ka jingjia.
Shuh shuh, u la iathuh ruh ba ki bor synshar District ki la shim khia ia kane ka kam ban ia kren pynbeit na ka bynta ban nym mih kano kano ka kynrum ka kynram bad lyngba katei ka Peace Committee kin ia kren sani ban pynneh pynsah ia kashongsuk ka shongsain ki paidbah ha kitei ki shnong khappud, u la bynrap.
